Սեպտեմբերի 6-ին Իրանը կսկսի իրանական միջուկային համաձայնագրի շրջանակում պարտավորությունների կրճատման երրորդ փուլը: Այս մասին հայտարարել է Իրանի նախագահ Հասան Ռոհանին, փոխանցում է Mehr-ը:
Նրա խոսքով՝ Իրանի ձեռնարկած միջոցները կիրականացվեն ԱԷՄԳ-ի նորմերի եւ կանոնների շրջանակում: «Եվրոպան կստանա եւս մեկ 60-օրյա մորատորիում, եւ երբ նրանք (Եվրոպան) իրենց պարտավորությունները կատարեն, Իրանը կհետեւի համաձայնագրով իր պարտավորություններին»,- նշել է Ռոհանին:
«Մենք կատարեցինք մեր պարտավորությունների կրճատման առաջին քայլը եւ մնացյալ կողմերին տրամադրեցինք երկամսյա ժամկետ: Այնուհետեւ մենք սկսեցինք երկրորդ փուլը՝ նրանց տրամադրելով եւս մեկ երկամսյա ժամկետ: Չորսամսյա ժամանակահատվածում մենք բանակցություններ ենք վարել մյուս կողմերի հետ, այդ թվում՝ Եվրամիության եւ համաձայնագիրը ստորագրած եվրոպացիների հետ»,- հիշեցրել է Ռոհանին՝ հավելելով, թե քանի որ Իրանը չի հասել ցանկալի արդյունքի, պարտավորությունների կրճատման երրորդ քայլը կկատարվի ուրբաթ:
«Իրանի Ատոմային էներգիայի կազմակերպությունը երրորդ փուլում պարտավոր կլինի անմիջապես հետազոտություններ եւ մշակումներ սկսել ու դադարեցնել միջուկային համաձայնագրով նախատեսված բոլոր պարտավորությունները»,- ասել է նա:
Սպասվում է, որ Կազմակերպությունը սրընթաց կընդլայնի իր «հետազոտությունները եւ տարբեր նոր ցենտրիֆուգերի մշակումները, այն ամենի, ինչը երկրին անհրաժեշտ կլինի ուրանի հարստացման համար»:
