«Իմ քայլը» խմբակցության հետ հանդիպմանը քննարկվել է Ամուլսարի հարցը, լսվել են կարծիքները, ներկայացվել է առկա իրավիճակը: Այս մասին, այսօր՝ սեպտեմբերի 6-ին, ՔՊ գրասենյակում կայացած փակ հանդիպումից հետո լրագրողների հետ զրույցում նշեց Ալեն Սիմոնյանը:
«Սրություն չկար, շատ ավելի համերաշխ է անցել, լսել ենք կարծիքները: Եզրահանգում չկա: Եթե եզրահանգում լինի, հանրությունը դրա մասին կիմանա: բացության մասը միշտ ապահովել ենք»,-ասաց Սիմոնյանը՝ հավելելով, որ միայն այդ հարցն են քննարկել, այլ հարցերի անդրադարձ չի եղել:
«Տարակարծություն չկա, հիմնականում խոսքը գնում է, թե սա ինչի է այսպես, բա սրա մասին ինչ եք կարծում, այս պարագայում ինչ ենք անելու: Սենց բովանդակային քննարկման ձեւաչափով է եղել: Հարցը կառավարության տիրույթում է, նա պետք է որոշում կայացնի, իսկ խմբակցությունը քաղաքական հենարանն է, որը եղել է ու մնալու է»,-ասաց ԱԺ փոխնախագահը:
Ինչ վերաբերում է նրան, որ «Իմ քայլը» խմբակցությունում կան պատգամավորներ, որ դեմ են Ամուլսարի շահագործմանը, Ալեն Սիմոնյանն ասաց. «Հանրության մեջ էլ կան բազմաթիվ մարդիկ որ դեմ են, եւ կան բազմաթիվ մարդիկ, որ կողմ են: Այս քննարկումները հենց նրա համար են, որ մենք մարդկանց, մեր գործընկերներին լսենք եւ ճիշտ որոշում կայացնենք Հայաստանի համար: Նախորդ անգամ ասում էիք, որ Գագիկ Խաչատրյանի ձերբակալությունն արվել է Ամուլսարի թեման փակելու համար: Ես ասացի, որ մեզ մոտ նման գործելաոճ չկա: Հիմա էլ սա աշխատանքային քննարկում է, որ պարզաբանենք, թե որ որոշումն է ամենաճիշտը»:
Նա տեղեկացրեց, որ սկզբում խոսել է վարչապետ Նիկոլ Փաշինյանը, հետո եղել է հարցերի գրանցում, պատգամավորները հարցեր են ուղղել: Հարցերին պատասխանել է թե վարչապետը, թե փոխվարչապետ Տիգրան Ավինյանը:
«Չի բացառվում, որ հանքն ընդհանրապես չշահագործվի, եւ չի բացառվում, որ հանքը սկսի շահագործվել»,-ասաց նա՝ հավելելով, որ սա կարող է ձգվել այնքան, մինչեւ վստահ լինեն, որ ճիշտ որոշում են կայացնում:
Ինչ վերաբերում է խոսակցություններին, թե Ամուլսարի վերաբերյալ եղել են բաներ, որ չի զեկուցվել վարչապետին, Ալեն Սիմոնյանն ասաց. «եթե պարզ դառնար, որ եղել են բաներ, որոնք չեն զեկուցվել, այդ սկայպ-կոնֆերանսը չէր լինի»:
