Ատոմային էներգիայի միջուկային գործակալությունը (ԱԷՄԳ) իր կառավարման խորհրդին տեղեկացրել է, որ Իրանը կարող է թաքցնել միջուկային նյութերը եւ դրանց հետ կապված գործունեությունը։ Համապատասխան հաղորդագրությունը շաբաթ օրը Twitter-ում տեղադրել է ազգային անվտանգության հարցերով ԱՄՆ նախագահի խորհրդական Ջոն Բոլթոնը, հայտնում է ՏԱՍՍ-ը։
«ԱԷՄԳ-ի գլխավոր տնօրենի պաշտոնակատարը (Կոռնել Ֆերուցե) ուղեւորվում է Իրան այն ժամանակ, երբ ԱԷՄԳ-ը իր կառավարման խորհրդին տեղեկացրել է , որ Իրանը կարող է թաքցնել միջուկային նյութերը եւ/կամ գործունեությունը միջուկային ոլորտում»,- գրել է Բոլթոնը։
«Մենք միանում ենք կառավարման խորհրդի մյուս անդամներին՝ ակնկալելով կարճ ժամկետում լիարժեք պատասխան ստանալ իրավիճակի մասին»,- հավելել է նա։
Շաբաթ օրը ԱԷՄԳ-ի պաշտոնական ներկայացուցիչ Ֆրեդրիկ Դալը հայտնել էր, որ գործակալությունը ծանոթացել է միջուկային ծրագրի համաձայնագրով նախատեսված իր պարտավորությունները 3-րդ անգամ կրճատելու Իրանի հայտարարության մասին ԶԼՄ-ների տեղեկատվությանը։ Միաժամանակ, սեպտեմբերի 8-ին Իրանում նախատեսված է Ֆերուցեի հանդիպումը իրանական իշխանությունների հետ։ Գործակալությունում նշել են, որ այդ հանդիպումը ԱԷՄԳ-ի եւ Իրանի փոխգործակցության մի մասն է, որը կապված է միջուկային համաձայնագրի ստուգման եւ մոնիթորինգի հետ։
