Այսօր շատ կարեւոր օր է մեզ համար, Ստեփանակերտ քաղաքի համար։ Այս մասին այսօր՝ սեպտեմբերի 8-ին, լրագրողների հետ զրույցում ասաց Ստեփանակերտի քաղաքապետի թեկնածու Գրիգորի Սահակյանը։
«Բոլորս կատարում ենք մեր ընտրությունը, ընտրությունը դեպի մեր ապագա, դեպի մեր խաղաղ կյանք, ընտրությունը մեր ընտանիքների համար եւ ընտրությունը դեպի մեր երազանքների քաղաք։ Հուսով եմ, որ բոլորս միասին, մեր բոլորիս ջանքերով կկարողանանք իրականացնել ամեն ինչ, որ էլ ավելի բարեկեցիկ քաղաք ունենանք, էլ ավելի գեղեցիկ քաղաք ունենանք, եւ կարողանանք մեր երեխաների համար կերտել մեր ապագան»,–նշեց նա։
Իր սպասելիքների մասին խոսելիս Գրիգորի Սահակյանն ասաց. «Ամենից կարեւորը սպասում եմ, որ մեր ժողովրդի կամքը լինի, մեր ժողովրդի ցանկությունը ապագան կերտելու համար՝ ինչ քաղաք են ուզում տեսնել՝ ըստ մեր ծրագրերի»։
Հարցին՝ ինչ կուենան ստեփանակերտցին, եթե իրեն ընտրի, նա պատասխանեց. «Խաղաղ, բարեկարգված, բոլորիս համար հավասար պայմաններով, սոցիալապես ապահովված, բոլորի հոգսերով զբաղվող համայնքի ղեկավար»։
Լրագրողները հետաքրքրվեցին՝ ի՞նչ է անելու ընտրվելու դեպքում, որն է լինելու առաջին քայլը, որին ի պատասխան քաղաքապետի թեկնածուն ասաց. «Նորից այցելելու ենք քաղաքի բոլոր փողոցները, բոլոր տեղերը, որ չենք եղել, որ ճշտում իրականացնենք, տվյալներ հավաքենք, որ իրականություն դառնա մեր ասածները եւ նոր եռանդով անցնենք աշխատանքի»։
Հարցին՝ չընտրվելու դեպքում վերադառնալո՞ւ է բանակ, նա արձագանքեց՝ «միշտ բանակի կողիքն է»։
