Միացյալ Նահանգները կշարունակեն ճնշում գործադրել «Թալիբանի» վրա, որպեսզի նրանք կատարեն խաղաղ բանակցությունների ժամանակ ստանձնած պարտավորությունները, եւ միեւնույն ժամանակ չեն կրճատի աֆղանական զորքերի ռազմական աջակցությունը, հայտարարել է պետքարտուղար Մայք Պոմպեոն:
«Եթե թալիբները չեն կատարում իրենց ստանձնած պարտավորությունները մի քանի շաբաթ շարունակ, ապա նախագահ Դոնալդ Թրամփը չի պատրաստվում նվազեցնել ճնշումը, մենք չենք պատրաստվում կրճատել աֆղանական անվտանգության ուժերի աջակցությունը»,-ասել է Պոմպեոն CNN-ին տված հարցազրույցում:
Նա նշել է, որ թալիբները «չափն անցել են»՝ պայթեցնելով իրենց ավտոմեքենան Քաբուլում ԱՄՆ-ի դեսպանատան հարեւանությամբ դիվանագիտական շրջանում, որի հետեւանքով զոհվել է ամերիկացի զինվոր եւ եւս 11 մարդ: Այնուհետեւ Թրամփը չեղարկել է թալիների առաջնորդների հետ Քեմփ-Դեւիդում կայանալիք բանակցությունները:
Պոմպեոյի խոսքով՝ թալիբները պետք է փոխեն իրենց վարքագիծը: Նա չի պարզաբանել՝ կվերսկսվեն արդյոք խաղաղ բանակցությունները, թե ոչ:
Նա նշել է, որ Թրամփը չի որոշել՝ դուրս կբերի արդյոք նա ամերիիկյան զորքերին Աֆղանստանից, սակայն նախազգուշացրել է թալիբներին ռազմական ճնշումները վերսկսելու մասին, եթե նրանք շարունակեն հարձակումները: «Ես հուսով եմ, որ դա այն դեպքն է, երբ թալիբները կփոխեն իրենց վարքն ու կհամաձայնվեն մեզ հետ: Ի վերջո, որոշումը կընդունվի բանակցությունների միջոցով»,-ասել է Պոմպեոն:
