Այս օրենսդրական նախաձեռնության իրականացման համար մենք ստիպված կլինենք հրաժարվել 117 մլն դրամ հարկային մուտքերից, բայց դրա համար պետությունը հարկադրված կլինի ծախսել կրկնակի, իսկ գուցեւ եւ եռակի շատ վարչական ռեսուրսներ: Այս մասին սեպտեմբերի 9-ին ԱԺ-ում երկրորդ ընթերցմամբ Հարկային օրենսգրքում լրացումներ կատարելու մասին օրինագծի քննարկման ժամանակ ասաց Տնտեսական հարցերով խորհրդարանական մշտական հանձնաժողովի նախագահ, «Իմ քայլը» իշխող խմբակցության պատգամավոր Բաբկեն Թունյանը:
Այսինքն, նրա խոսքով, վնասի գնահատման համար կառավարությունը ստիպված կլինի մարդկանց առանձնացնել, որոնք ստիպված կլինեն տեղերում լինել, հաշվարկ կատարել, դրա համար ժամանակ եւ միջոցներ ծախսելով: «Այսինքն՝ նրանք ստիպված կլինեն որոշել, թե որքան բերք է վնասվել՝ 49 տոկո՞ս, թե՞,ասենք, 51 տոկոս: Սա նման է այն բանին, եթե որեւէ մեկին, օրինակ, պետք է 100 դրամ հատկացնեն, իսկ հանուն դրա պետք է տաքսի վարձեն, 1000 դրամ ծախսեն, եւ այդ ամենը միայն այն նպատակով, որ մեկին 100 դրամ հասցնեն»,- նշեց խորհրդարանական հանձնաժողովի նախագահը:
Ընդ որում՝ նա նշեց, որ առաջարկված օրինագծի տրամաբանությունից ելնելով՝ իրենք ստիպված կլինեն փոխհատուցում վճարել նաեւ այն քաղաքացիներին, որոնց գույքը վնասվել է նույն անբարենպաստ բնակլիմայական երեւույթների հետեւանքով (ցրտահարում, կարկուտ, երաշտ): «Տնտեսության տեսանկյունից այս օրինագիծը եւ դրանում առաջարկված միջոցառումները, ավելի շուտ, մեր պետությանը զգալի վնաս կհասցնեն, քան որեւիցե օգուտ կտան»,- շեշտեց Թունյանը:
Նշենք, որ օրինագիծն առաջին ընթերցմամբ ստացել էր խորհրդարանի հավանությունը, սակայն այնուհետեւ «Իմ քայլի» պատգամավորները անսպասելի կերպով հանդես են եկել իրենց իսկ հավանությունը ստացած օրինագծի դեմ: