Մեծ Բրիտանիայի վարչապետ Բորիս Ջոնսոնի գրասենյակը կհամաձայնվի ազգային խորհրդարանի աշխատանքի վերականգնմանը, եթե Գերագույն դատարանն աջակցի Շոտլանդիայի դատարանի որոշմանը, որը երեկ որոշել է, որ օրենսդիր մարմնի գործունեության դադարեցումը անօրինական էր, հայտնում է The Times-ը:
«Մենք լիովին հարգում ենք դատական համակարգի անկախությունը»,- ասել է վարչապետի գրասենյակի պաշտոնական ներկայացուցիչը: Պարբերականը սա գնահատել է որպես Ջոնսոնի պատրաստակամություն ենթարկվելու Գերագույն դատարանի որոշմանը: Այն գործը քննելու է սեպտեմբերի 17-ին, եւ մինչեւ դա խորհրդարանը փակ կմնա:
Financial Times պարբերականն այս կապակցությամբ չորեքշաբթի հայտնել էր, որ Գերագույն դատարանի որոշման վրա մեծ ուշադրություն է բեւեռվել, քանի որ դատավորներն, ըստ էության, պետք է որոշեն՝ օգոստոսի 28-ին Ջոնսոնը Եղիսաբեթ II թագուհուն արդյոք ապատեղեկատվությո՞ւն է տվել, երբ նրանից ձեռք է բերել 5 շաբաթով խորհրդարանի աշխատանքի դադարեցման պաշտոնական հավանությունը: Վարչապետն այս քայլը հիմնավորել է տակավին հուլիսի վերջին ձեւավորված նոր կառավարության գործունեության ծրագրի մշակման անհրաժեշտությամբ: Ջոնսոնը հերքել է պնդումները, թե այս քայլն ուղղված է պատգամավորներին խանգարելուն արգելափակել Եվրամիությունից երկրի դուրս գալը առանց Brexit-ի պայմանների համաձայնագրի:
Շոտլանդիայի վերաքննիչ դատարանը, սակայն, չորեքշաբթի հակառակն է որոշել՝ այդ քայլում տեսնելով Ջոնսոնի մտադրությունը Brexit-ի ընթացքը որոշել առանց ժողովրդի ընտրյալների մասնակցության: Դատավորները խորհրդարանի աշխատանքի դադարեցումն անվանել են «անօրինական, հետեւաբար անվավեր եւ իրավաբանական ուժ չունեցող»:
Financial Times-ը ուշադրություն է դարձնում այն հանգամանքին, որ Լոնդոնի Գերագույն դատարանը նույնպես չորեքշաբթի որոշում էր կայացրել, որը տարբերվում է Շոտլանդիայի վճռից: Այն որոշել է, որ Ջոնսոնի որոշումը բացառապես քաղաքական է եւ չի կարող լինել դատաքննության թեմա: Ի պատասխան պարբերականի հարցմանը՝ իրավաբանների մեծամասնությունը կասկածել են, որ Գերագույն դատարանն այլ որոշում կայացնի, այն կաջակցի շոտլանդական վերաքննիչ դատարանի դիրքորոշմանը: Պարբերականի կարծիքով՝ հիմնական հարցը, որին Գերագույն դատարանի դատավորները պետք է պատասխանեն հետեւյալն է՝ ընդհանրապես դատավորները կարո՞ղ են վերանայել թագուհուն տրամադրված վարչապետի հանձնարարականները, թե՞ այսպիսի դեպքերը բարձր քաղաքականության «արգելված գոտու» մեջ են, որտեղ դատարանները չեն մտնում:
Մեծ Բրիտանիան ԵՄ-ն պետք է լքեր 2019 թվականի մարտի 29-ին, այսինքն՝ միությունից դուրս գալու մասին գրավոր իրազեկելուց հետո 2 տարի անց: Սակայն բրիտանական խորհրդարանի Համայնքների պալատի պատգամավորները 3 անգամ մերժել են Brexit-ի պայմանների մասին համաձայնագրի նախագիծը, որ ձեռք էր բերվել Բրյուսելի եւ վարչապետ Թերեզա Մեյի կառավարության միջեւ: Արդյունքում ԵՄ-ն համաձայնվել էր Brexit-ը տեղափոխել ապրիլ կամ մայիս, այնուհետեւ հոկտեմբերի 31, իսկ Մեյը ստիպված էր հրաժարական ներկայացնել՝ չկարողանալով իրավիճակը փակուղուց հանել: