ՀԱՊԿ-ն միշտ կողջունի նախկին ԽՍՀՄ բոլոր հանրապետությունների հետ համագործակցությունը։ Այս մասին Երեւանում լրագրողների հետ զրույցում ասաց ՌԴ փոխվարչապետ, ՀԱՊԿ Ռազմատնտեսական համագործակցության հարցերով միջպետական հանձնաժողովի ղեկավար Յուրի Բորիսովը։
Պատասխանելով ՀԱՊԿ-ում Ադրբեջանին գործընկերոջ կարգավիճակ տրամադրելու հնարավորության մասին հարցին, Բորիսովը հիշեցրեց, որ հետխորհրդային տարածքի բոլոր երկրները երբեմնի միասնական ընտանիքից էին։ Դա վերաբերում է նաեւ նախկին ԽՍՀՄ բոլոր հանրապետությունների ռազմական ուժի որոշակի հավասարակշռությանը։
«Այդ պատճառով մենք բոլոր երկրների, այդ թվում Ադրբեջանի հետ ռազմատեխնիկական համագործակցության շատ կշռադատված եւ մտածված քաղաքականություն ենք վարում։ Հավատացեք, Ռուսաստանը չի ցանկանում սրել հակամարտությունը, այլ հակառակը՝ ամեն կերպ նպաստում է, որպեսզի հակամարտությունը վերանա»,- հայտարարեց Բորիսովը՝ հիշեցնելով այդ գործընթացում ՌԴ նախագահի դերի մասին։
Պատասխանելով հարցին, թե արդյոք ինքը չի բացառում Ադրբեջանին կարգավիճակի տրամադրումն այն դեպքում, երբ Հայաստանը դեմ է հանդես գալիս, Բորիսովը հիշեցրեց, որ կազմակերպությունում հարցերը լուծվում են կոլեկտիվ կարգով։ Այդ պատճառով համապատասխան քննարկումներից հետո, եթե կազմակերպությունը նման որոշման անհրաժեշտություն տեսնի, ապա որոշումը կընդունվի կազմակերպության կանոնադրության, կանոններին եւ կանոնակարգին համապատասխան։
