«Զինված խմբի» պարագլուխ Արթուր Վարդանյանի համար անսպասելի էր գրավի դիմաց իրեն կալանքից ազատ արձակելու դատարանի որոշումը։ Այս մասին դատարանի դահլիճում NEWS.am–ի հարցին ի պատասխան ասաց նա։

Վարդանյանն, ով կալանքի տակ գտնվելու չորս տարվա ընթացքում մի շարք հիվանդություններ է ձեռք բերել, հայտարարեց, որ առաջին հերթին կզբաղվի իր առողջական վիճակով։

«Կփորձեմ ապաքինվել, առողջությունս հետ բերել, հետագայում երեխաներիս կտեսնեմ, ահագին ժամանակ չեմ տեսել նրանց»,–հայտարարեց ամբաստանյալը։

 Հիշեցնենք, որ այսօր՝ սեպտեմբերի 13–ին Երեւանի ընդհանուր իրավասության դատարանը՝ նախագահությամբ Մեսրոպ Մակյանի, անսպասելի որոշում կայացրեց։ Դատարանը բավարարեց 2015-ի նոյեմբերի 25-ին  Նորք–Մարաշում վնասազերծված  «Զինված խմբի» պարագլուխ Արթուր Վարդանյանի պաշտպանների միջնորդությունը եւ 1 մլն դրամ գրավի դիմաց ազատ արձակեց Վարդանյանին։

Նշենք, որ գործով շուրջ երկու տասնյակ ամբաստանյալներից միայն Վարդանյանն էր գտնվում կալանքի տակ. ամբաստանյալներից շատերն ազատվել են կալանքից 2018թ. ամռանը՝ հետհեղափոխական շրջանում։

Հիշեցնենք, որ գործը վերամակագրվել էր դատավոր Մեսրոպ Մակյանին այն բանից հետո, երբ գործը քննող Երեւանի ընդհանուր իրավասության դատարանի դատավոր Արմեն Բեկթաշյանը նշանակվել էր Վերաքննիչ քրեական դատարանի դատավոր։

Հիշեցնենք, որ 2015-ի նոյեմբերի 25-ին ԱԱԾ-ն հայտարարություն տարածեց այն մասին, որ Նորք–Մարաշում վնասազերծվել է զինված խումբ:

Ըստ մեղադրանքի՝ Արթուր Վարդանյանի գլխավորած՝ 2015 թվականին Նորք-Մարաշում վնասազերծված 20 հոգանոց զինված խումբը ծրագրել է բռնությամբ զավթել իշխանությունը: Մասնավորապես, թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, Կառավարության, Հանրային հեռուստաընկերության եւ այլ հաստատությունների շենքերի վրա: Գործով ամբաստանյալի կարգավիճակում են պաշտպանության նախկին փոխնախարար Վահան Շիրխանյանը, Գյումրու Կաթոլիկ եկեղեցու քահանա Անտոն Դիկրան Թոթոնջյանը եւ եւս 17 անձ։