Խորհրդարանում առաջին ընթերցմամբ ընդունվեց բալային համակարգի նոր փոփոխությունը, որով մի շարք իրավախախտումներ գումարային արժողությամբ նվազելու են, դրանց փոխարեն կիրառվելու են բալեր: Այս մասին այսօր` սեպտեմբերի 14-ին, մամուլի ասուլիսին ասաց «Վարորդի ընկեր» ՀԿ նախագահ Տիգրան Քեյանը` անդրադառնալով Ճանապարհային երթևեկության կանոնակարգման բալային համակարգի ներդրմանը:
«Այսինքն ըստ տարբեր կատարված իրավախախտման աստիճանի տարբեր տաբեր բալեր են կուտակելու վարորդները, որով եթե մեկ տարվա ընթացքում վարորդը կուտակի 9 բալային միավոր, ապա վարորդական վկայականի կասեցում է նախատեսվում` 6 ամսից 1 տարի ժամկետով, իսկ կասեցումն ավարտելուց հետո եթե կրկին մեկ տարվա մեջ 9 բալ հավաքի, արդեն վարորդական վկայականի զրկման առջեւ կկանգնի: Այս փոփոխությունը կատարվել է մի պարզ պատճառով մարդկանց հնարվորություն է տալիս, որ ավելի զգույշ եւ օրենքի համապատասխան երթեւեկեն եւ բացի այդ գումարային արժողությամբ մարդկանց պատիժն ավելի նվազեցնեն: Այսինքն այստեղ խնդիրը դրված չէ գումարներ հավաքագրելու, կամ գումարներ կորզելու վարորդներից, հարկադիրի հետ խնդիրներ ունենալուց, այստեղ նախատեսված է այն, որ վարորդները պետք է երթեւեկեն օրենքի պահանջին համապատասխան»,-ասաց նա:
Քեյանը նշեց, որ վարորդական իրավունքի կասեցումից հետո վարորդը կարող է նորից երեթեւեկել, իսկ վարորդական իրավունքի զրկումից հետո, նորից պետք է համապատասխան քննություն հանձնի:
Տիգրան Քեյանը կարծում է, որ օրենսդրական նախաձեռնությունը նաեւ բացեր ունի, մասնավորապես` վարչական մարմնի հայեցողությանն է թողնված, թե ինչ ժամանակահատվածում պետք է կասեցվի վարորդական իրավունքը:
Նշենք, որ նախագծով նաեւ նախատեսվում է, որ այն վարորդները, որոնց բալերի թիվը մոտենում է 9-ին, կարող են քննություն հանձնել եւ նվազեցնել իրենց բալերը:
