Չինաստանի հարբած քաղաքացին սկանդալ է ստեղծել եւ կծել է բորտ ուղեկցորդուհիներից մեկին Աթենք-Պեկին չվերթը կատարող ինքնաթիռում, հաղորդում է ՌԻԱ Նովոստի-ն՝ հղում կատարելով տեղական ԶԼՄ-ներին:
Beijing News թերթի տեղեկություններով՝ դեպքը տեղի է ունեցել սեպտեմբերի 11-ին Աթենքից դեպի Պեկին թռիչք կատարող ինքնաթիռում: Ուղեւորուհիներից մեկը, որը ՉԺՀ-ի քաղաքացի է, թռիչքի ժամանակ ալկոհոլ է օգտագործել, սկսել վիճել մյուս ուղեւորների հետ եւ կծել բորտ ուղեկցորդուհիներից մեկին, որը փորձել է միջամտել վեճին:
Պեկինի միջազգային օդանավակայանում ինքնաթիռի վայրէջքից հետո ոստիկանությունը բերման է ենթարկել կնոջը վարչական իրավախախտում կատարելու հատկանիշներով: Ներկայումս իրավախախտ կինը գտնվում է կալանքի տակ:
2018 թվականի ապրիլին Air China ավիաընկերության ինքնաթիռը արտակարգ վայրէջք էր կատարել Հենան նահանգի Չժենչժոու քաղաքում անվտանգության նկատառումներով, քանի որ ուղեւորներից մեկը պատանդ էր վերցրել բորտ ուղեկցորդուհուն:
