Աֆղանստանում տեղի է ունեցել պայթյունների շարք, որոնց հետեւանքով զոհվել են մի քանի տասնյակ մարդիկ: Առավել արյունահեղ է եղել Քաբուլից հյուսիս գտնվող Փարվան-Չարիքարե նահանգի վարչական կենտրոնում Աֆղանստանի նախագահ Աշրաֆ Գանիի նախընտրական հանրահավաքի ժամանակ տեղի ունեցած պայթյունը: Տեղական իշխանությունների տղեկություններով՝ զոհվել է առնվազն 24 մարդ, եւս 31-ը վիրավորվել է: Նախագահն ինքը չի տուժել, փոխանցում է DW-ն:
Երկրի ՆԳՆ տեղեկություններով՝ պայթյունն իրագործել է մոտոցիկլետով մահապարտը: Եվս երկու պայթյուն են որոտացել Քաբուլում՝ մեկը ԱՄՆ դեսպանատան մոտ, մյուսը՝ ամերիկյան ռազմաբազայի մոտ: Զոհվել է առնվազն 6 մարդ: Իրականացված հարձակման պատասխանատվությունն առայժմ ոչ մեկը չի ստանձնել:
«Թալիբան» իսլամական արմատական շարժումը օգոստոսի սկզբին բնակչությանը կոչ էր արել նախագահական ընտրությունները բոյկոտել՝ միաժամանակ սպառնալով բռնությամբ: Թալիբների տարածած հայտարարության մեջ նշված էր, որ մարդիկ պետք է հեռու մնան նախընտրական միջոցառումներից, որ հարձակումների զոհ չդառնան:
Աֆղանստանի նախագահական ընտրությունները նախատեսված են սեպտեմբերի 28-ին: Հուլիսի վերջին նախընտրական քարոզարշավի առաջին օրը մռայվել էր խոշոր ահաբեկչությամբ: Այդ ժամանակ Քաբուլում փոխնախագահի թեկնածու Ամրուլլահ Սալեհի գրասենյակի մոտ ականապատված ավտոմեքենայի պայթյունի հետեւանքով զոհվել էր 20 մարդուց ավելի: