ՀՀ կառավարությունը տարեվերջին մտադիր է 2571 հարկ վճարողներին վերադարձնել 56 մլրդ դրամի չափով ԱԱՀ դեբետային պարտքը: Այս մասին ԱԺ արտահերթ նիստի ժամանակ «Հայաստանի Հանրապետության հարկային օրենսգրքում փոփոխություններ եւ լրացումներ կատարելու մասին» օրինագծի քննարկման ընթացքում հայտարարեց Պետեկամուտների կոմիտեի նախագահ Դավիթ Անանյանը:

Բացի այդ, ինչպես նշեց Դավիթ Անանյանը, տվյալ փոփոխությամբ կվերադարձվեն նաեւ «հին» դեբետները:

Նա հստակեցրեց, որ ավելացված արժեքի հարկի դեբետը գումար է, որը հարկ վճարողները պարտք են վերցրել կառավարությունից ԱԱՀ հաշվարկումից հետո:

ՊԵԿ նախագահն ընդգծեց, որ այդ օրինագիծը բացառում է «հին» եւ «նոր» դեբետները, եւ բոլոր դեբետներն այժմ կվերադարձվեն հարկ վճարողներին:

«Դեբետների ընդհանուր գումարը կազմում է մոտ 56 մլրդ դրամ, իսկ անձանց թիվը, որոնք մինչեւ 5 մլն դրամի չափով դեբետներ ունեն, գերազանցում է 2000-ը: Մենք որոշում ենք կայացրել, որ վերադարձը կիրականացվի 3 գործընթացով: ԱԱՀ դեբետային միջոցները՝ մինչեւ 5 մլն դրամ, կվերադարձվեն առանց որեւէ պահանջի: Նրանց համար, որոնց ԱԱՀ դեբետային գումարը կազմել է 5-40 մլն դրամ, հեշտացված գործընթաց կկիրառենք: Իսկ նրանց նկատմամբ, ում դեբետային գումարը գերազանցում է 40 մլն դրամը, ուսումնասիրություն կամ ստուգում կանցկացնենք»,- հստակեցրեց Անանյանը:

Նրա խոսքով՝ ընթացիկ տարվա սեպտեմբերի 8-ի դրությամբ շահառուների ընդհանուր թիվը կազմում է 2835 հարկ վճարող, որոնցից գործում է 2751-ը:

«Տարեվերջին դեբետները կվերադարձվեն 2571 անձի: Նրանց բաժին է հասնում 50 մլրդ 784 հազար դրամ»,- հավելեց ՊԵԿ նախագահը: