Ոստիկանությունը կիրականացնի անհրաժեշտ աշխատանքներ թե նախկին, թե ներկա հնարավոր կոռուպցիոն ռիսկերը բացառելու եւ բացահայտելու համար: Այս մասին այսօր` սեպտեմբերի 20-ին, ՀՀ նախագահական նստավայրում պաշտոնական պարգեւատրման արարողությունից հետո լրագրողների հետ զրույցում ասաց ՀՀ ոստիկանապետի պաշտոնակատար Արման Սարգսյան` անդրադառնալով վարչապետի հետ այսօր ավելի վաղ ունեցած քննարկմանը:
«Նոր շունչ է տրվելու կոռուպցիայի դեմ պայքարին, մոտ ապագայում այդ շունչը զգացնել կտա: Որեւէ դեպքում կոմպրոմիսի չեմ գնա»,- ասաց նա` նշելով, որ փորձելու է հասնել ավելի լավ արդյունքների, քան իր նախորդները:
Ոստիկանապետի պաշտոնակատարը խուսափեց պատասխանել նախկին ոստիկանապետ Վալերի Օսիպյանի պաշտոնանկության պատճառների մասին հարցին, հավաստիացնելով, որ նրա պաշտոնավարման ընթացքում տարվել է կոռուպցիայի դեմ պայքար, ինչը ինքը շարունակելու է. «Անընդհատ այդ հանցավոր երեւույթի դեմ պետք է պայքարել, եթե արմատախիլ արվի միայն համակարգված կոռուպցիան, դա չի ընկալվի որպես ամբողջական մոտեցում: Կոմպլեքս լուծումներ պիտի տրվեն` թե օրենսդրական, թե` աշխատանքային»:
Ամուլսարի հանքի շահագործման դեմ ընթացող բողոքի ակցիաները ոստիկանության կողմից ճնշելու վերաբերյալ հարցին Արման Սարգսյանը հստակ պատասխան չտվեց` կարծիք հայտնվելով, որ ընդհանուր լուծումներ կտրվեն:
