ԱՄՆ դաշնային առեւտրային հանձնաժողովը հակամենաշնորհային հետաքննություն է անցկացնում Facebook-ի հանդեպ, հայտնում է The Wall Street Journal-ը՝ հղում կատարելով աղբյուրներին։ Նրանք պնդում են, որ գործի շրջանակներում իշխանությունները զրուցում են սոցցանցի թե՛ հին, թե՛ նոր մրցակիցների հետ։ Նրանց նպատակն է հասկանալ, թե ինչպես է Facebook-ը իրեն պահել շուկայում եւ որքանով է ազնիվ եղել նրա կողմից մրցակցությունը, հայտնում է Forbes-ը։
Դաշնային առեւտրային հանձնաժողովը վերջին ամիսներին շփվել է տեխնիկական ընկերությունների տասնյակ ղեկավարների եւ հավելվածներ ստեղծողների հետ։ Բացի այդ, իշխանությունները զրուցել են ստարտափների ղեկավարների հետ, որոնք դադարել են գոյություն ունենալ այն բանից հետո, երբ կորցրել են հասանելիությունը Facebook-ի հարթակին, ինչպես նաեւ հիմնադիրների հետ, որոնք իրենց ընկերությունները վաճառել են սոցցանցին, ասել են WSJ-ի զրուցակիցները։
Facebook-ի ղեկավարությունը անհանգստացած է նրանից, որ մրցակիցները կարող են իշխանություններին պատմել այնպիսի բան, որը կվնասի ընկերությանը, ասել են թերթի աղբյուրները։ Նրանց խոսքերով, ընկերությունում արդեն մտածում են ինչպես լավացնել հարաբերությունները Սիլիկոյան հովտում հարեւանների հետ։
Իշխանությունների հետ համագործակցող ընկերություններից մեկը Snap Inc-ն է, մեսենջերի ստեղծող Snapchat-ը։ Մի քանի տարի առաջ Facebook-ի հիմնադիր եւ ղեկավար Մարկ Ցուկերբերգը Snapchat-ը գնելու համար 3 մլրդ դոլար էր առաջարկել, սակայն մերժվել էր։
WSJ-ի աղբյուրները հայտնել են, որ Snap-ի իրավաբանները մի քանի տարի մի ամբողջ դոսյե են հավաքել այն մեթոդներով, որոնք Facebook-ն օգտագործել է մրցակցային պայքարում։ Snap-ում այդ տեղեկատվությունը անվանում են Վոլան դե Մորտ (Project Voldemort՝ Հարի Փոթերի մասին գրքերի գլխավոր չարագործի պատվին), գրում է թերթը։