News
Լրահոս
News
Երկուշաբթի
Հոկտեմբեր 21
USD
476.32
EUR
531.95
RUB
7.48
ME-USD
0.07
Տեսնել լրահոսը


ՀՀՇ համահիմնադիր, ԱԱԾ (ԱԱՊՎ) նախկին ղեկավար, քաղաքական գործիչ Դավիթ Շահնազարյանը ուղերձով է հանդես եկել, որով կոչ է անում վարչապետ Նիկոլ Փաշինյանին ու ԱԱԾ նախկին տնօրեն Արթուր Վանեցյանին վերջ դնել միմյանց հանդեպ հրապարակային մեղադրանքներին, քանի որ նրանք մոտենում են վտանգավոր եզրագծի։

«Պարոն Փաշինյան, պարոն Վանեցյան, ակնհայտ է, որ դուք մոտեցել եք արդեն մի սահմանագծի, որից այն կողմ մեծագույն վտանգ է։ Այս սահմանագիծը, որին դուք արդեն հասել եք, այն եզրագիծն է, որից հետո պետության շահն է։ Ձեզ համար էլ պետք է ակնհայտ լինի, որ միմյանց դեմ ուղղված այս խաղում ձեզնից ոչ մեկը չի շահելու, առավել եւս, չի հաղթելու. երկուսդ էլ կորցնելու եք, բայց այդ գործընթացի շարունակության դեպքում անդառնալի կորուստներ կարող է ունենալ մեր պետականությունը։  Դուք զբաղեցրել եք եւ զբաղեցնում եք երկու կարեւորագույն պաշտոններ. հստակ պետք է գիտակցեք, որ թե դուք, թե այդ պաշտոնները  զբաղեցրած բոլոր ձեր նախորդները ՝ սկսած խորհրդային ժամանակներից, տիրապետում են տեղեկատվության այնպիսի հսկայական ծավալի, որ անգամ դրա փոքր մասի արտահոսքը կարող է բերել մեծ ցնցումների, որից միանգամից կարող են օգտվել մեր հակառակորդներն ու արտաքին ուժերը։  Պարոնայք, ես ձեզ կոչ եմ անում ամբողջովին գիտակցել այդ պատասխանատվությունը, որ կա ձեր վրա, փակել այդ թեման, վերջակետ դնել։

Դուք հստակ պետք է գիտակցեք, որ, հանգամանքների բերումով, զբաղեցնելով այդ պաշտոնները, պետականության հանդեպ ձեր պատասխանատվությունը չի ավարտվել , կամ չի ավարտվելու ձեր պաշտոնանկությամբ։ Դուք դատապարտված եք այդ պատասխանատվությունը կրել ողջ կյանքում, ապրել այդ պատասխանատվությամբ։ Ոչ մի քաղաքական պայքար չի կարող լինել անսահմանափակ։ Կուսակցական եւ անձնական շահերից միշտ վեր պետք է լինի պետականության շահը։ Ես վստահ եմ, որ դուք գիտակցում եք, որ պաշտոնները, պաշտոնավարումը ժամանակավոր են, իսկ պետությունը, որը բացարձակ արժեք է, մշտական է։ Ինչքան էլ զարմանալի լինի շատերի համար, ես հուսով եմ, որ պատասխանատվությունը ձեր մեջ կհաղթահարի ամեն ինչ, կհաղթահարի ձեզ շրջապատողների ցանկությունը եւ ոգեւորությունը շարունակել այս ամենը։ Ես ձեզ կոչ եմ անում դնել վերջակետ, թեման համարել փակված» ,– ասված է նրա ուղերձում։

Տպել