Իրանի ԱԳ նախարար Մոհամմադ Ջավադ Զարիֆը մերժել է Բրիտանիայի, Ֆրանսիայի եւ Գերմանիայի կոչը Իրանի միջուկային ծրագրի շուրջ բանակցությունների նոր փուլի մասին, որը վերաբերելու է տարածաշրջանային անվտանգությանը, փոխանցում է Mehr-ը:
«Առանց ԱՄՆ թույլտվության եվրաեռյակի կաթվածահարումն ակնհայտ դարձավ 2018 թվականի մայիսից»,- թվիթերյան իր էջում նշել է Զարիֆը՝ ի պատասխան Ֆրանսիայի, Գերմանիայի եւ Մեծ Բրիտանիայի հայտարարության:
Զարիֆն առաջարկել է այս թերությունը հաղթահարել կամք դրսեւորելու միջոցով «անկախ ճանապարհի ձեւավորման համար, այլ ոչ թե այն նպատակով, որպեսզի չհակասեն ԱՄՆ անհեթեթ հայտարարություններին եւ խնդրանքներին, որոնք միջուկային համաձայնագրի հետ համատեղելի չեն»:
«Ոչ մի գործարք չի լինի մինչեւ ներկայիս համաձայնագրին հետեւելը»,- հավելել է նա:
Ֆրանսիան, Գերմանիան եւ Մեծ Բրիտանիան Իրանին մեղադրել են Սաուդյան Արաբիայի նավթային օբյեկտների վրա հարձակման մեջ՝ Թեհրանին բանակցությունների կոչ անելով «իր միջուկային ծրագրի համար երկարաժամկետ հիմքի շուրջ, ինչպես նաեւ տարածաշրջանային անվտանգության հետ կապված հարցերով»:
