Վերջին տարիների իրադարձությունները վկայում են միջազգային ասպարեզում ահաբեկչական կազմակերպությունների շարունակվող ակտիվացման մասին։ Այս մասին ասաց ՀՀ ԱԱԾ տնօրենի պաշտոնակատար, գնդապետ Էդուարդ Մարտիրոսյանը ԱՊՀ մասնակից պետությունների անվտանգության եւ հատուկ ծառայությունների հակաահաբեկչական մարմինների ղեկավար կազմի հավաքի բացման ժամանակ։
Նրա խոսքով՝ ելնելով դրանից, ահաբեկչությունը եւ ծայրահեղականությունը նախկինի պես մնում են հիմնական սպառնալիքների շարքում։ Փորձագետների գնահատմամբ՝ առաջիկա տարիներին ահաբեկչական կազմակերպությունների ակտիվության նվազում չի կանխատեսվում։ «Չնայած ներկայում Հայաստանի տարածքի հանդեպ կոնկրետ ահաբեկչական ձգտումներ բացահայտված չեն, այնուամենայնիվ, հաշվի առնելով երկրի աշխարհագրական դիրքի առանձնահատկությունները եւ դրանով պայմանավորված՝ հնարավոր տարածաշրջանային գործընթացներին ներգրավվելու հեռանկարները, չի կարելի բացառել, որ միջազգային ահաբեկչական կազմակերպությունները կարող են Հայաստանն ընտրել որպես գրոհի թիրախ»,- նշել է Մարտիրոսյանը։
Նա առաջարկել է, որ նման միտումների բացահայտման նպատակով՝ ԱՊՀ Հակաահաբեկչական կենտրոնի եւ գործընկերների ակտիվ համագործակցությամբ կատարվում է սպառնալիքների պարբերական վերլուծություն։ Հատուկ ուշադրություն է դարձվում կրիտիկական կարեւոր ենթակառուցվածքի օբյեկտների, այդ թվում վառելիքաէներգետիկ համալիրի պաշտպանությանը։ Հենց դրանով է բացատրվում «Արարատ-հակատեռոր 2019» զորավարժությունների մտահղացումը։
Որպես զորավարժությունների անմիջական օբյեկտ ընտրվել են կրիտիկական կարեւոր օբյեկտների տեղակայման շրջանները։ Ըստ նախնական մտահղացման՝ միջազգային ահաբեկչական կազմակերպությունների «քնած օղակները» նախատեսում են խախտել վառելիքաէներգետիկ ենթակառուցվածքը եւ ապակայունացնել իրավիճակը հանրապետությունում։
Մարտիրոսյանը հիշեցրել է, որ նման մասշտաբի զորավարժություններ Հայաստանում առաջին անգամ չէ, որ իրականացվում են։