Եգիպտոսի ԱԳՆ-ն Թուրքիայի նախագահ Թայիփ Էրդողանին մեղադրել է ստելու մեջ՝ համաշխարհային հանրությանը կոչ անելով նրան պատասխանատվության ենթարկել ահաբեկչությանն աջակցելու պատճառով: Չորեքշաբթի այս մասին Al Arabiya հեռուստաալիքին հայտնել է գերատեսչության պաշտոնական ներկայացուցիչ Ահմեդ Հաֆեզը: Նրա արձագանքը հաջորդել է ի պատասխան թուրք առաջնորդի հերթական արտահայտությունների, որոնք կատարել է ՄԱԿ ԳՎ 74-րդ նստաշրջանի շրջանակում, այդ թվում՝ Եգիպտոսի նախկին նախագահ Մուհամմեդ Մուրսիի մահվան մասին:
«Կցանկանայի իմ խորը զարմանքն ու վրդովմունքը հայտնել այն համառության կապակցությամբ, որով Էրդողանը շարունակում է մեղադրանքներ առաջադրել եւ անհամոզիչ ու սուտ հայտարարություններ կատարել՝ իբր պաշտպանելով արդարության արժեքները»,- ասել է Հաֆեզը:
Նրա կարծիքով՝ «Եգիպտոսի վերաբերյալ Թուրքիայի նախագահի վերջերս կատարած հայտարարությունները միայն ուշադրությունը շեղելու հուսահատ փորձ են իր ռեժիմի խորացող վիճակից եւ չդադարող անհաջողություններից, որոնք նա չի հանդուրժում ինչպես կուսակցության մակարդակում, այնպես էլ ներքին եւ միջազգային ասպարեզում»:
Դիվանագետը, մասնավորապես, բերել է մի քանի օրինակ, որոնք, նրա խոսքով, «ապացուցում են արդարության մասին Էրդողանի խոսելու անհեթեթությունը»: Այսպես՝ նա պնդել է, որ Թուրքիայում «քաղաքական եւ զինվորական» բանտարկյալների թիվն անցնում է 75 հազարից, որոնց թվում կան հարյուրավոր լրագրողներ եւ լրատվամիջոցների ներկայացուցիչներ, միաժամանակ կառուցվում են նոր բանտեր, որոնց մեջ գրանցվում են «կասկածելի հանգամանքներում, կտտանքների կամ պահման վատ պայմանների հետեւանքով կալանավորների մահվան տասնյակ դեպքեր»: Հաֆեզը թուրք առաջնորդին մեղադրել է, որ նա «ապաստան է տալիս «Մուսուլման եղբայրներ իսլամական ասոցիացիայի ահաբեկիչներին»՝ նրանց տրամադրելով «քաղաքական աջակցություն եւ մեդիա հարթակներ՝ Եգիպտոսում եւ ամբողջ տարածաշրջանում իրենց սասանող գաղափարներն առաջ մղելու համար»:
«Սիրիայում ահաբեկչությանը նրա աջակցությունը հանգեցրեց ձգձգված հակամարտության, որի հետեւանքով զոհվեցին հարյուր հազարավոր սիրիացիներ, եւ որը կանխամտածված ուղղված էր քրդերի դեմ՝ բռնաճնշումների, սպանությունների եւ ցեղասպանության միջոցով, ինչը դասվում է մարդկության դեմ հանցագործությունների կարգին, որոնք պատիժ են պահանջում եւ վաղեմության ժամկետ չունեն, դրան հավելած ինչպես տարածաշրջանի, այնպես էլ Եվրոպայի, Աֆրիկայի եւ Ասիայի երկրներ ահաբեկիչների եւ արտասահմանցի զինյալների ներթափանցման թողտվությունը՝ կայունությունը խափանելու նպատակով,- շեշտել է Եգիպտոսի ԱԳՆ ներկայացուցիչը: - Չի կարելի նաեւ չնկատել այն փաստը, որ նա շարունակում է հանդես գալ Լիբիայում ծայրահեղական խմբավորումների եւ զինված կազմավորումների կողմում՝ նրանց ցուցաբերելով ամեն տեսակի քաղաքական եւ նյութատեխնիկական օգնություն զենքով ու տեխնիկայով»:
«Եթե Էրդողանն իսկապես իսկական արդարություն է ցանկանում, ապա միջազգային հանրությունը նրան պետք է պատասխանատվության ենթարկի բոլոր հանցագործությունների, հատկապես ահաբեկչությանը սատարելու, զենքով ապահովելու եւ ՄԱԿ Անվտանգության խորհրդի բանաձեւերը խախտելով՝ ապաստան տրամադրելու համար, ինչպես նաեւ իր ժողովրդի ու քրդերի դեմ հանցագործությունների համար»,- ամփոփել է Հաֆեզը:
