Եթե մենք տեսնենք, որ կենսական սպառնալիք գոյություն ունի Ջերմուկի, ցանկացած տարածաշրջանի կամ Սեւանի համար, այդ նախագիծը կփակվի։ Այս մասին, Կոլումբիական համալսարանում պատասխանելով Ամուլսարի հանքավայրի շահագործման մասին հարցին, ասաց վարչապետ Նիկոլ Փաշինյանը։
«Սա մի իրավիճակ է, որը մենք ժառանգել ենք նախկին կառավարությունից։ Սա շատ նուրբ հարց է։ Սա ոչ միայն բնապահպանական խնդիր է, այլեւ միջազգային հանրության առջեւ Հայաստանի պարտավորությունների հարցն է։ Մենք պետք է շատ զգույշ լինենք այդ խնդրի լուծման հարցում, որպեսզի վնաս չհասցնենք ոչ միայն շրջակա միջավայրին, այլեւ ներդրումային միջավայրին եւ Հայաստանի միջազգային պարտավորություններին»,- հայտարարեց նա։
Փաշինյանը հավելել է, որ խնդիրը հեշտ լուծում չունի, եւ չի կարելի ընդունել ինչ-որ մեկի վախերի, շշուկների եւ ռիսկերի վրա հիմնված որոշում։ «Մենք պետք է իսկապես հասկանանք այս իրավիճակը եւ կշռադատված որոշում կայացնենք»,- հավելեց նա։