Հայաստանում ԱՄՆ դեսպանությունը նշել է համատեղ հայ-ամերիկյան հյուսիսատլանտյան արժեքներին նվիրված ծրագրի ավարտը։ Ծրագրի շրջանակներում դեսպանությունում տեղի է ունեցել գրաֆիտիով 100 մետրանոց պատի բացման արարողությունը։

Միջոցառմանը մասնակցել են եվրոպական եւ ամերիկյան փոխանակման ծրագրերով Հայաստանում սովորող ուսանողներ, ինչպես նաեւ մի շարք երկրների դեսպաններ եւ Հայաստանի ԱԳՆ ներկայացուցիչներ։ Ծրագիրը, որը նվիրված է Բեռլինյան պատի անկման 30 ամյակին, խորհրդանշում է Ֆ․ Դ․ Ռուզվելտի կողմից հռչակված «չորս ազատությունները»՝ ազատություն վախից, խոսքի ազատություն, ազատություն կարիքից եւ կրոնական ազատություն։ Իր ելույթում Հայաստանում ԱՄՆ դեսպան Լին Թրեյսին նշեց, որ Բեռլինյան պատը 28 տարի Արեւմուտքը Արեւելքից բաժանող ֆիզիկական եւ գաղափարական պատնեշ էր։

Նրա խոսքերով, այդ ծրագիրը ապագայի հույս է ներշնչում՝ հիշեցնելով այն մասին, որ ֆիզիկական եւ փոխաբերական պատնեշները կարող են հաղթահարվել։ Պատի գեղարվեստական կոնցեպցիան, ինչպես նշել է դեսպանը, արտացոլում է խաղաղության, համագործակցության եւ մարդու իրավունքները հարգելու ընդհանուր արժեքները, եւ ամրապնդում է ԱՄՆ-ի վաղեմի ու մշտական  հավատարմությունը Հայաստանում ժողովրդավարական գործընթացների եւ ինստիտուտների զարգացման աջակցությանը։ Նախաձեռնողներից Տաթեւ Ավետիսյանի խոսքերով, պատը նաեւ հայ-ամերիկյան համագործակցությունն է մատնանշում։ Նա ասել է, որ նկարիչներ Արա Պետրոսյանը եւ Գարեգին Ենգիբարյանը գրաֆիտիի արվեստում միավորել են մի քանի ոճեր՝ մինիմալիզմը, էքսպրեսիոնիզմը։