Հացադուլն, իհարկե, քաղաքական պայքարի մեթոդ է, բայց ոչ ամենալավը, մամուլի ասուլիսում հայտարարել է հանրապետական պատգամավոր Ռազմիկ Զոհրաբյանը` մեկնաբանելով «Ժառանգություն» կուսակցության առաջնորդ Րաֆֆի Հովհաննիսյանի օրինակով «Ազատության» հրապարակում մի խումբ մտավորականների հայտարարած հացադուլը:
«Այո, իհարկե, հացադուլը բողոքի ձեւ է, բայց պետք չէ անել այն, որտեղ պատահի, օրինակ, «Ազատության» հրապարակում: Ավելի լավ է հացադուլ անեն իրենց տանը»,- ասել է պատգամավորը:
Խոսելով այն մասին, թե այդ եւ այլ ակցիաները երկրում ստեղծված բարդ տնտեսական իրավիճակի արդյունք են, Զոհրաբյանը նկատել է, թե դժգոհության ալիքը մշտապես ուղղվում է ՀՀԿ-ի կողմը: «Բայց ոչ բոլոր դեպքերում է ՀՀԿ-ն մեղավոր դժբախտություններում: Որոշ խնդիրներ պայմանավորված են միջազգային միտումներով»,- ասել է նա:
Զոհրաբյանը ընդգծել է, թե կարեւորը իրավիճակը չսրելն է: «Մենք պետք է խուսափենք մարտի 1-ի իրադարձություններից: Ահա թե ինչու Հայ ազգային կոնգրեսի հանրահավաքի մասնակիցներին թույլ տրվեց մտնել «Ազատության» հրապարակ»,- ասել է Զոհրաբյանը եւ հավելել, թե Հայաստանի նախագահը բռնապետ չէ, Քադաֆի չէ:
