Արտադատարանական սպանությունների հարցերով ՄԱԿ հատուկ զեկուցող Ագնես Կալամարը քննադատել է Սաուդյան Արաբիայի արքայազնին՝ լրագրող Ջամալ Խաշոգջիի սպանության հետ կապված պատասխանատվությունից խուսափելու համար։
Ամերիկյան ԶԼՄ-ներին տված հարցազրույցում արքայազն Մուհամմեդ բին Սալմանը հայտարարել էր, որ Խաշոգջիի սպանության հրաման չի տվել, եւ նախօրոք չի իմացել այդ մասին, սակայն նշել էր, որ, որպես Սաուդյան Արաբիայի առաջնորդ, պատասխանատվությունն իր վրա է։
Կալամարը, որը անկախ հետաքննություն է անցկացրել եւ թագաժառանգ արքայազնին այդ սպանության հետ կապող «հավաստի ապացույցներ» է հայտնաբերել, արքայազնի այդ դիրքորոշումը «խնդրահարույց» է անվանել։
«Նա իր վրա է վերցնում սպանության կորպորատիվ պատասխանատվությունը, ինչն ինքնաբերաբար պարզ է»,- AFP-ին տված հարցազրույցում ասել է Կալամարը։
Նրա խոսքերով, հարցազրույցով նշանավորվել է արքայազն Մուհամմեդի զիջումը, որ «Խաշոգջիի սպանությունը պետության կողմից սպանություն է»։ Սակայն փորձագետը քննադատել է արքայազնին, որ «հանցագործության համար անձնական պատասխանատվություն» չի վերցրել։ «Նա հսկայական դիստանցիա է ստեղծում իր եւ հանցագործության միջեւ՝ պնդելով, թե ինքը չի կարող պատասխանատվություն կրել Սաուդյան Արաբիայի բոլոր պետական ծառայողների վարքագծի համար»,- հավելել է Կալամարը։
Նա նշել է, որ «վերջին 12 ամիսների ընթացքում սաուդյան պետությունը, նրա տարբեր ներկայացուցիչները եւ արքայազնը հանցագործության բնույթի առնչությամբ ստել են միջազգային հանրությանը»։ «Ինչո՞ւ պետք է մենք այժմ հավատանք նրա խոսքին, որ, այո, նա կորպորատիվ պատասխանատվություն ունի, սակայն չունի անձնական պատասխանատվություն։ Դա բավարար չէ»,- կարծում է Կալամարը։
