Վերսալի պալատում մենակ, առանց բազմաթիվ զբոսաշրջիկների շրջելու հազվադեպ հնարավորություն է ստեղծվել HTC Vive-ի եւ Oculus Rift-ի VR սաղավարտներ ունեցողների համար շնորհիվ Google-ի։ Որոնողական համակարգը թանգարանի վարչության հետ համատեղ ստեղծել է Լյուդովիկոս XIV-ի պալատում վիրտուալ էքսկուրսիայի հավելված, տեղեկացնում է Vesti-ն։

Նախագծի համար նկարահանվել եւ մանրամասն եռաչափ օբյեկտների են փոխակերպվել 21 սրահների ինտերիերները՝ 36 հազար քառակուսի մետր ընդհանուր մակերեսով (ներառյալ պատերը եւ առաստաղները)։ Թվայնացվել են նաեւ շատ կտավներ ու քանդակներ, որոնք VR սաղավարտների օգտատերերը կկարողանան դիտել շատ մանրամասն։

Տվյալները զբաղեցրել են մոտ չորս տերաբայթ։ Հավելվածում կարելի է այցելել թագավորի եւ թագուհու առանձնասենյակներ, Թագավորական օպերային թատրոն, Թագավորական ժամատուն, Հայելային դահլիճ եւ պալատի այլ մասեր։ Հավելվածը Windows-ի համար հասանելի է անվճար, Steam պլատֆորմում։