Խնդիրը ուժեղ բիզնեսի զարգացման պայմանների ստեղծումն է: Այս մասին հոկտեմբերի 1-ին «ԵՏՄ երկրների արդյունաբերության արտահանման-ներմուծման հնարավորությունները եւ նրանց գործընկերությունը որպես Եվրասիական մայրցամաքի տարանցման ներուժի հիմք» թեմատիկ նիստի ժամանակ ասաց ԵՏՀ Կոլեգիայի արդյունաբերության եւ ագրոարդյունաբերության համալիրի հարցերով անդամ (նախարար) Ալեքսանդր Սուբոտինը: Նրա խոսքով՝ ԵՏՄ գոյության տարիներին գրանցվել են հաջողություններ, սակայն նաեւ շտկումներ կատարելու անհրաժեշտություն է առաջացել:
«Միությունն, ըստ էության, նոր-նոր սկսում է ծավալվել: 2019 թվականի 6 ամիսների արդյունքներով՝ ԵՏՄ շրջանակում արդյունաբերության աճը կազմել է ավելի քան 2 տոկոս: Նման ցածր ցուցանիշները կապված են աշխարհում առեւտրային պատերազմների ֆոնին անբարենպաստ պայմանների հետ: Սա խոսում է այն մասին, որ նոր մոտեցումներ են անհրաժեշտ, որոնց մշակմանը պետք է ներգրավվի նաեւ բիզնեսը: Դրա համար անհրաժեշտ է համաձայնեցնել Միության շրջանակում արդյունաբերության եւ տրանսպորտի զարգացման միջոցառումները, ինչպես նաեւ աշխատել տնտեսության 19 կոնկրետ ճյուղերի ուղղությամբ: Կարեւոր բաղադրիչ պետք է լինի լոգիստիկայի ծախսերի կրճատումը: Վերջապես՝ եթե ԵՏՄ-ն ցանկանում է համաշխարհային տնտեսության մեջ իր արժանի տեղն ունենալ, անհրաժեշտ է աշխատել անդրազգային ընկերության ստեղծման ուղղությամբ»,- նշեց նա: