Եթե խոսքը Հայոց եկեղեցու մասին է, ապա Հայոց եկեղեցին հայ ազգն է ներկայացնում, եւ միանշանակ իր զավակները պաշտպանում են եկեղեցին, հանձինս ինձ, բայց եթե կան հոգեւորականներ, որոնց ես չեմ ընդունում, եթե անհատի մասին է խոսքը, ուրեմն ինքը գիտի՝ ինչ է ասում: Այս մասին, այսօր՝ հոկտեմբերի 2-ին, ԱԺ-ում լրագրողների հետ զրույցում նշեց ԲՀԿ խմբակցության պատգամավոր Վարդան Ղուկասյանը՝ անդրադառնալով ՀՀ վարչապետ Նիկոլ Փաշինյանի հայտարարությանը, թե կան եկեղեցականներ, որոնք քանդում են կառավարության ոտքի տակը, եւ այդպիսիք ծնկի կբերվեն:
«Իսկ ով է ասում, որ եկեղեցականները կառավարության ոտքի տակը քանդում են: Հայոց եկեղեցուն ոչ ոք չի կարողացել ծնկի բերել՝ լինի սելջուկ, թե մոնղոլ-թաթար: Ես չեմ պատկերացնում, որ Նիկոլ Փաշինյանը ամբողջ եկեղեցու մասին նման բան ասի: Հավանական է, որ 1-2 անհատի մասին է: Եթե մի քանի անհատի մասին է, ես էլ եմ դրան կողմնակից: Ես շատ հոգեւորականների հետ չունեմ եւ չեմ էլ ուզի, որ նրանք հոգեւորական լինեն, եւ կուզեմ նրանց փիլոնից զրկեն»,-ասաց Վարդան Ղուկասյանը: