Երեւանում Իրանի նախագահ Հասան Ռուհանիի հետ քննարկումները դարձան այն քաղաքական երկխոսության տրամաբանական շարունակությունը, որ մեկնարկել էր 2019թ․ փետրվարին Թեհրան իմ այցի ժամանակ։ Այս մասին Ազգային ժողովի հոկտեմբերի 2-ի նիստում ասաց վարչապետ Նիկոլ Փաշինյանը՝ պատասխանելով պատգամավորների հարցերին։
«Հանդիպումն անցել է բացարձակապես բաց՝ հաշվի առնելով Իրանի շուրջ իրավիճակը, ինչպես նաեւ էներգետիկ ոլորտում համագործակցության ընդլայնման մեր շահագրգռվածությունը»,- ասաց Փաշինյանը։ Նա նշեց, որ քննարկումներն անցել են նաեւ հաշվի առնելով այն, որ վնաս չպատճառվի երրորդ երկրների հետ հարաբերությունների զարգացման գործընթացին։ «Երկու երկրների կառավարությունները հստակորեն հասկանում են, ինչպես փոխհարաբերությունների զարգացման նրբերանգները, այնպես էլ յուրաքանչյուր կողմի ունեցած խնդիրները, եւ ձգտում են համատեղ ուղիներ գտնել դրանց լուծման համար»,- հայտարարեց վարչապետը։
Հիշեցնենք, որ հոկտեմբերի 1-ին Երեւանում անցկացվեց Եվրասիական տնտեսական բարձրագույն խորհրդի նիստ, որին, բացի ԵՏՄ անդամ երկրների ղեկավարներից, ներկա էին նաեւ պատվավոր հյուրեր՝ Իրանի նախագահը եւ Սինգապուրի վարչապետը։
ԵՏԲԽ նիստի շրջանակներում տեղի ունեցավ Նիկոլ Փաշինյանի եւ Հասան Ռուհանիի դեմ առ դեմ հանդիպում։
