ՄԱԿ-ը կոչ է անում Իրաքին արագ եւ թափանցիկ հետաքննել ոստիկանների եւ ցուցարարների բախումները, որոնց հետեւանքով տասնյակ մարդիկ են զոհվել։
«Մենք կոչ ենք անում Իրաքի կառավարությանը մարդկանց թույլ տալ ազատ իրականացնել իրենց կարծիք արտահայտելու եւ խաղաղ հավաքներ անցկացնելու իրավունքը»,- Ժնեւում լրագրողներին ասել է ՄԱԿ մարդու իրավունքների գրասենյակի մամուլի քարտուղար Մարթա Ուրտադոն։
Իրաքում չորրորդ օրն է՝ շարունակվում են բողոքները, որոնց հետեւանքով ոչ պաշտոնական տվյալներով զոհվել է 34 մարդ, տեղեկացնում է AFP-ն։
Ուրտադոն տեղեկացրել է, որ ՄԱԿ մարդու իրավունքների գրասենյակը հաստատել է 12 մահվան դեպքերը Բաղդադում՝ ավելացնելով, որ «հարյուրավոր մարդիկ վիրավորվել են, ներառյալ անվտանգության ուժերի աշխատակիցները»։ «Տասնյակ ցուցարարներ կալանավորվել են, թեեւ նրանց մեծամասնությունը հետագայում ազատ է արձակվել»,- ասել է նա։
Կոռուպցիայի, գործազրկության եւ ծառայությունների անբավարարության դեմ ցույցերն առաջին անգամ բռնկվեցին Բաղդադում երեքշաբթի, եւ այդ ժամանակվանից տարածվել են երկրի հարավում, որտեղ գերակշռում են շիաները, այն դեպքում, երբ հյուսիսային եւ արեւմտյան նահանգները համեմատաբար հանգիստ են։
«Մենք անհանգիստ ենք այն տեղեկություններից, որ անվտանգության ուժերը օգտագործել են մարտական փամփուշտներ որոշ շրջաններում, ինչպես նաեւ կրակել են արցունքաբեր գազի բալոններից անմիջապես ցուցարարների վրա»,- ասել է Ուրտադոն՝ ավելացնելով, որ «ցույցերի դեպքում ուժի կիրառումը պետք է լինի բացառիկ դեպքերում»։
«Բոլոր միջադեպերը, որոնցում անվտանգության ուժերի գործողությունները հանգեցրել են մահվան եւ վիրավորումների, պետք է անհապաղ, անկախ եւ թափանցիկ հետաքննվեն»,- ասել է նա։