Անհայտ անձինք թմրավաճառի հետ հարցազրույցի ժամանակ հրազենային վնասվածք են հասցրել National Geographic-ի լրագրողին, նրա զրուցակիցը մահացել է, հայտնում է ՌԻԱ Նովոստի-ն։
«Մոտ 19։30-ին տեղի է ունեցել միջադեպ՝ բռնության գործադրմամբ, որի ընթացքում վիրավորվել է National Geographic միջազգային կազմակերպության լրագրողը։ Նկարահանող խումբը տեսագրությունը կատարում էր մի տանը, որը թմրանյութերի վաճառքի կետ էր»,- ասվում է հաղորդագրության մեջ։
Հաստատության տեղեկատվությամբ, մրցակից բանդայից զինված խումբը ներխուժել է տուն եւ գնդակահարել թմրավաճառին, որը տեղում մահացել է։ Լրագրողը, ում անունը չեն հայտնում , ոտքին հրաձգային վնասվածք է ստացել եւ տեղափոխվել է հիվանդանոց։ Նկարահանող խմբի երեք մյուս անդամները գտնվում են գլխավոր դատախազության պաշտպանության տակ։
Նախօրեին լրագրողները ռեպորտաժը նկարահանելու համար խորհրդատվություն են խնդրել դատախազությունից, սակայն չեն տեղեկացրել, որ պատրաստվում են հարցազրույց անել այն տանը, որտեղ թմրամիջոցներ են վաճառում։ Ավելի վաղ այդ տունը խուզարկել էին այն բանից հետո, երբ այնտեղ գնդակահարել էին տեղացի հանցավոր խմբի երկու անդամների։
Իրավապահ մարմինները սկսել են հետաքննել միջադեպը։
