DigiTec ՏՏ տեխնոլոգիաների տարածաշրջանային ամենամյա ցուցահանդեսի շրջանակում Հայաստանի եւ Հնդկաստանի միջեւ պայմանագիր է ստորագրվել ArMath ինժեներական լաբորատորիաների ֆրենչայզինգի մասին:
Հայկական կողմից պայմանագիրը ստորագրել է «Տեղեկատվական տեխնոլոգիաների ընկերություների ասոցիացիա» հասարակական կազմակերպության տնօրեն Կարեն Վարդանյանը, իսկ հնդկական կողմից՝ հնդկական բարեգործական հիմնադրամի ղեկավար Հեկտար Շախը: Պայմանագիրը նախատեսված է որպես պիլոտային ծրագիր ArMath ինժեներական լաբորատորիաների մոդելները Հնդկաստան արտահանելու համար, որից հետո արդեն կառավարության աջակցությամբ այդ լաբորատորիաների քանակը կավելանա:
ArMath ինժեներական լաբորատորիայի ստեղծած ծրագիրը Տեղեկատվական տեխնոլոգիաների ասոցիացիայի կողմից նախաձեռնվել էր որպես Տեխնիկական կրթության հայկական մոդել: Ներկայումս այդպիսի մոդելն արտահանվել է Վրաստան եւ Արցախ: Լաբորատորիաներում 10-18 տարեկան դպրոցականներն ստանում են արտադասարանային կրթություն: Ինտերակտիվ պարապմունքների, մրցույթների եւ ինովացիոն ճամբարների միջոցով դպրոցականներն ուսումնասիրում են տեխնոլոգիա, ինժեներիա եւ մաթեմատիկա: Երիտասարդ ինժեներները նաեւ հնարավորություն ունեն ծրագրավորել, ստեղծել, փորձարկել եւ զարգացնել սեփական ինժեներական լուծումները:
