Այսօր աշխարհի ճարտարապետների եւ ճարտարապետական գլուխգործոցները գնահատողների մասնագիտական միջազգային տոնն է՝ Ճարտարապետության միջազգային օրը (World Architecture Day), որը նրանք նշում են հոկտեմբերի առաջին երկուշաբթի, հայտնում է Calend.ru-ն:
Տոնը սահմանել է Ճարտարապետների միջազգային միությունը՝ МСА (International Union of Architects, UIA): 1985 թվականին МСА ժողովում նախապես որոշվել է Ճարտարապետության միջազգային օրն ամեն տարի նշել հուլիսի 1-ին: Իսկ 1996 թվականին Բարսելոնայում Միության 20-րդ Գլխավոր ասամբլեայում բանաձեւ է ընդունվել Ճարտարապետության միջազգային օրը հոկտեմբերի առաջին երկուշաբթի տեղափոխելու մասին՝ այն նվիրելով Հաբիթաթի միջազգային օրվան (Կացարանի միջազգային օր):
Ճարտարապետների միջազգային միությունը ստեղծվել է Երկրորդ աշխարհամարտից անմիջապես հետո: Այդ ժամանակ Միության համար հրատապ էր պատերազմի հետեւանքով ավերված քաղաքների, բնակավայրերի եւ արդյունաբերական ձեռնարկությունների վերականգնման խնդիրը: ԽՍՀՄ Ճարտարապետների միությունը МСА-ի հիմնադիրներից եւ նրա գործունեության ակտիվ մասնակիցներից մեկն էր: Հիմա МСА-ն ունի հարյուրից ավելի ազգային սեկցիաներ եւ միլիոնից ավելի ճարտարապետներ:
