«WCIT 2019» ՏՏ համաշխարհային համաժողովը եւս մեկ անգամ աշխարհի ուշադրությունը կենտրոնացնում է Հայաստանի վրա որպես ՏՏ ոլորտում լուրջ հայտ ներկայացնող երկիր: Այս մասին NEWS.am-ի հետ զրույցում նշեց ԱԺ տնտեսական հարցերի հանձնաժողովի նախագահ Բաբկեն Թունյանը:
«Բացի դրանից, համոզված եմ, որ կլինեն նաեւ գործնական քայլեր եւ համագործակցության նոր ճանապարհներ կգտնվեն»,-ասաց նա:
Անդրադառնալով Հայաստանից ուղեղների արտահոսքի խնդրին, ն ասաց. «Ուղեղների արտահոսքը շատ նորմալ երեւույթ է, ընդ որում, տարբեր ուղղություններով: Նույն հաջողությամբ նաեւ դրսից են Հայաստան գալիս:
Խնդիրն այն է, որ Հայաստանում ստեղծենք այնպիսի միջավայր, որտեղ ՏՏ ոլորտի աշխատողները կստանան այնպիսի բարձր աշխատավարձ, որքան արտերկրում: Այդ դեպքում ավտոմատ այդ ուղեղների արտահոսքը կվերանա: Իսկ դրա համար պետք է ընդամենը Հայաստանում հարկային եւ այլ միջավայրն վելի գրավիչ դարձնել, քան այն երկրներում, որտեղ դրանք կան: Նաեւ առկա կարգավորումները ավելի շահեկան լինեն, քան մրցակից երկրներում: Այդ դեպքում ՏՏ ոլորտի արդյունքը կստեղծվի Հայաստանում, ոչ թե մեր երկրում ստեղծվածը ուղղակի կգնա դուրս, իսկ ինչ-որ փուլում այդ աշխատողներն էլ դուրս կգնան:
Այդ հոսքին խոչընդոտելու պրոցեսը սկսվել է բնականոն ճանապարհով: Համոզված եմ, որ կարճ ժամանակ հետո դրան ականատես կլինենք»,-ասաց պատգամավորը:
Նա նկատեց, որ որքան էլ փորձենք ուղեղների արտահոսքը փակել, միեւնույն է, Հայաստանում այսօր ունենք կադրերի խնդիր. «Պետք է առաջին հերթին ամենամեծ ուշադրությունը դարձնել կրթության ոլորտին»:
