Այս պահին Հայաստանում գազի գնի բարձրացման որեւէ նշան չկա: Այս մասին հոկտեմբերի 8-ին ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նիստում «Մեղրի» ազատ տնտեսական գոտու շուրջ ստեղծված իրավիճակի քննարկման ժամանակ հայտարարեց փոխվարչապետ Մհեր Գրիգորյանը՝ պատասխանելով հունվարի 1-ից գազի հնարավոր թանկացման մասին հարցին:
Նրա խոսքով՝ բանակցությունները շարունակվում են:
«Դուք գիտեք, որ լոկալ իմաստով գազի գինը որոշվում է 3 բաղկացուցիչ մասերով՝ սահմանին գազի գին, ընթացիկ ներդրումներ եւ ընթացիկ ծախսեր: Ըստ էության, գնային փոփոխությունները կախված են այդ բաղկացուցիչ մասերի շուրջ բանակցային գործընթացից: Կարծում եմ՝ ԵԱՏՄ ընդհանուր տրամաբանությունն այն է, որ կա մանդատ՝ միասնական էներգետիկ շուկա, որտեղ պետք է միասնական քաղաքականություն լինի: Ահա այդ քաղաքականությունը որոշող երկրներից մեկը պետք է լինի Հայաստանը: Եթե տվյալ խնդիրը տեղափոխվի ԵԱՏՄ հարթակ, ապա մենք շահեկան դիրքում կհայտնվենք»,- ասաց Գրիգորյանը:
