Երեւանում աշխատանքն ավարտեց WCIT 2019 տեղեկատվական տեխնոլոգիաների համաշխարհային համաժողովը: Այն համարվում է IT ոլորտում ամենահեղինակավոր միջոցառումներից մեկը: Հոկտեմբերի 6-ին մեկնարկած համաժողովին մասնակցեցին ավելի քան 70 երկրների ներկայացուցիչներ (ֆոտոռեպորտաժ):
Համաժողովի շրջանակում ելույթով հանդես եկան ՀՀ վարչապետ Նիկոլ Փաշինյանը, WITSA-ի նախագահ Իվոն Չիուն, անվտանգության հարցերով ամերիկացի փորձագետ Ռիչարդ Քլարքը, ինչպես նաեւ VaynerX-ի եւ VaynerMedia-ի նախագահ Գարի Վայներչուկը, «GIPHY»-ի հիմնադիր Ալեքս Չունգը, հեռուստաաստղ Քիմ Քարդաշյանը, Reddit-ի եւ Initialized Capital-ի համահիմնադիր Ալեքսիս Օհանյանը, ռոք երաժշիտ Սերժ Թանկյանը, Acer-ի հիմնադիր Սթեն Շինը, IT ոլորտի այլ հեղինակավոր փորձագետներ:
Բացի այդ, Սերժ Թանկյանը, Ալեքսիս Օհանյանը, «Սինոփսիս Արմենիայի» նախագահ Երվանդ Զորյանն ու բարձր տեխնոլոգիական արդյունաբերության նախարար Հակոբ Արշակյանը հայտարարեցին Highconnect համահայկական թվային հարթակի ստեղծման մասին, որը կմիավորի աշխարհի բոլոր հայերին:
Փակման արարողությանը համաժողովի 40-ամյա պատմության մեջ առաջին անգամ կազմակերպվեցին մրցումային փուլեր, ընտրվեցին լավագույն ստարտափերը, որոնք հայկական ՏՏ կազմկոմիտեի անունից ստացան «Armenian Tech Community Prize» մրցանակը: Հաղթողները, որոնք զբաղեցրին առաջին եւ երկրորդ տեղերը, ստացան մրցանակներ՝ 25 000 եւ 10 000 ԱՄՆ դոլարի չափով:
Այսպիսով, ստարտափը հաղթած թիմերն են՝
GeBe Cert - 10,000 դոլար
ForgeFiction - 25,000 դոլար
Virtlo - 10,000 դոլար
Embry Tech - 25,000 դոլար
Viciniti - 10,000 դոլար
Krisp - 25,000 դոլար
Տեղեկատվական տեխնոլոգիաների եւ ծառայությունների համաշխարհային դաշինքի (WITSA) գլխավոր քարտուղար Ջեյմս Պոիզանտը ամփոփիչ խոսքում երախտագիտություն հայտնեց միջոցառման բոլոր կազմակերպիչներին: «Մենք տուն կվերադառնանք, սակայն ընդմիշտ կպահենք մեր սրտերում այն, ինչ տեղի ունեցավ այս օրերին»,- նշեց Պոիզանտը:
WCIT 2019-ի կազմկոմիտեի նախագահ Ալեքսանդր Եսայանն էլ նշեց, որ շնորհակալություն է հայտնել ՀՀ կառավարությանը, հայկական տեխնոլոգիական միությանն ու միջոցառմանը մասնակցած կամավորներին: Փոխվարչապետ Տիգրան Ավինյանը, ամփոփելով համաժողովի արդյունքներն, կարծիք հայտնեց, որ միջոցառումը հիանալի է անցել, եւ հավելեց, որ մեր երկրին ավելի շատ նման մասշտաբային իրադարձություններ են անհրաժեշտ:
Հիշեցնենք՝ համաժողովի բացումը նշանավորվեց աննախադեպ համերգով, որի ընթացքում պատմության մեջ առաջին անգամ երաժիշտներն արհեստական ինտելեկտով գրված երաժշտություն կատարեցին: Համերգով հանդես եկավ նաեւ «Գրեմի» մրցանակակիր, աշխարհահռչակ DJ Արմին վան Բյուրենը:
NEWS.am գործակալությունը WCIT 2019-ի պաշտոնական մեդիագործընկերն էր: Մենք, համագործակցելով հայտնի լրագրող Հենրի Ասլանյանի հետ, ներկայացրինք համաժողովի մասնակիցների հետ էքսկլյուզիվ հարցազրույցներ:
Նշենք, որ WCIT 2019-ը հիմնադրվել է Տեղեկատվական տեխնոլոգիաների եւ ծառայությունների համաշխարհային միության կողմից: