Տվյալ օրինագծով ենթադրվում է, որ 10 եւ ավելի աշխատակից ունեցող գործատուներն աշխատավարձ պետք է վճարեն անկանխիկ եղանակով: Այս մասին այսօր ԱԺ առողջապահության եւ սոցիալական հարցերի մշտական հանձնաժողովի նիստում աշխատանքային օրենսգրքում փոփոխություններ կատարելու մասին օրինագծի քննարկման ընթացքում հայտարարեց «Իմ քայլը» խմբակցության պատգամավոր Գեւորգ Պապոյանը:
Ընդ որում, նա նշեց, որ օրինագծում փոփոխություններ են կատարվել: «Քանի որ մարզերում ենթակառուցվածքները դեռ այնքան էլ զարգացած չեն, անկանխիկ եղանակով աշխատավարձ վճարելու հետ կապված խնդիրներ են առաջանում: Այդ պատճառով տվյալ դրույթը կվերաբերի միայն Երեւանում գործող ընկերություններին»,- ասաց Պապոյանը:
Նշենք, որ հանձնաժողովը դրական եզրակացություն տվեց:
