Իտալիայում իտալերեն թարգմանությամբ լույս կտեսնի Լյուբով Դոստոեւսկայայի «Էմիգրանտուհի» վեպը, հաղորդում է ՏԱՍՍ-ը:
Հրատարակումը պատրաստվել է գրողի դստեր ծննդյան 150-ամյակի համար:
Աշխատանքներն իրականացրել են իտալական Մերանո քաղաքի «Ռուս» ասոցիացիան եւ դրա նախագահ Բյանկա Մարաբինի-Ցյոգելերը: Գրքի շնորհանդեսը կկայանա Բորոդինայի անվան ռուսական կենտրոնի գրադարանում, որն այս տարի նշում է իր 10-ամյակը:
Լյուբով Դոստոեւսկայան՝ իր հոր կենսագիրը, այցելում էր Մերանո: Նա երկու անգամ այցելել է Մերանո, այդ թվում մահից առաջ: Գրողի դուստրը մահացել է հարեւան Բոլցանո քաղաքում, որտեղ էլ հուղարկավորվել է:
«Էմիգրանտուհի» վեպը Դոստոեւսկայան գրել է Հռոմում, այն ինքնակենսագրության տարրեր է պարունակում: Անշուշտ, վեպում իտալական բազմաթիվ սյուժեներ կան, անձնական էմոցիաներ՝ Հավերժ քաղաքում զբոսանքների մասին, տպավորություններ Կոլիզեումից, կա մի ամբողջ գլուխ քրիստոնյա նահատակների մասին: Վերջին անգամ վեպը լույս է տեսել 1913-ին:
Ռուս ազնվական Նադեժդա Բորոդինայի անունը կրող ռուսական կենտրոնը շարունակում է Հարավային Տիրոլում ռուսական համայնքի ավանդույթները: Ռուսները վաղուց են ուղեւորությունների համար ընտրել Մերանոն, որտեղ Սանկտ Պետերբուրգից այցերի, այդ թվում կայսերական ընտանիքի ներկայացուցիչների այցերի շնորհիվ զարգացել է երկաթուղային ճանապարհը: 19-րդ դարի վերջին Մերանոյում ամուր ռուսական համայնք է ձեւավորվել: Կառուցվել է եկեղեցի սուրբ Նիկոլայի պատվին, որտեղ տոնական ծեսեր են կատարվում:
