Վերջին ժամանակահատվածում նախաձեռնվել են վերակառուցման եւ հիմնանորոգման աշխատանքներ մի շարք քրեակատարողական հիմնարկներում: Այս մասին այսօր` հոկտեմբերի 21-ին, ՔԿՀ ծառայության 100-ամյակին նվիրված միջոցառմանն ասաց Քրեակատարողական ծառայության պետ Արթուր Գոյունյանը:
«Վերջին ժամանակահատվածում նախաձեռնվել են վերակառուցման եւ հիմնանորոգման աշխատանքներ մի շարք քրեակատարողական հիմնարկներում, այդ թվում Արմավիր ՔԿՀ-ում իրականացվում են տեսակցության սենյակների հիմնանորոգման աշխատանքներ, դրանք միջազգային չափանիշներին համապատասխանեցնելու նպատակով: Սենյակները համալրվել են կենցաղային տեխնիկայով եւ խոհանոցային կահույքով, կահավորվելու է մանկական սենյակ: Ուշադրության կենտրոնում է նաեւ տարիներ շարունակ չլուծված օդափոխության հարցը: Աբովյան եւ «դատապարտյալների հիվանդանոց» ՔԿՀ-ներում մոտ օրերս կմեկնարկեն արտաքին եւ ներքին կոյուղու, ջրամատակարարման ցանցերի ու հանգույցների, Կոշ ՔԿՀ-ում ճաշարանի մասնաշենքի, իսկ Հրազդան եւ Նուբարաշեն ՔԿՀ-ներում արտաքին կոյուղու հիմնանորոգման աշխատանքներ»,-ասաց նա:
Ծառայության պետը նշեց, որ նաեւ եռանդուն աշխատանք է արվում անվտանգության նոր համակարգերի ներդրման, անվտանգության եւ պահպանման ոլորտների արդիականացման համար:
Գոյունյանի խոսքով` բարեփոխումներ են իրականացվել նաեւ ՔԿՀ-ներում գտնվող կալանավորված անձանց առողջության պահպանման ոլորտում:
Նրա խոսքով` ՔԿՀ-ներում չպետք է լինեն արտոնյալ անձինք, եւ իրենց աշխատանքներն ուղղված են կալանավորվածների վերասոցիալականացմանը նրանց հետ հոգեբանական եւ այլ աշխատանքներ տանելով:
