Կարեն Կարապետյանի կառավարությունը 10,7 տոկոս տնտեսական ակտիվությամբ հեռացել է. դու կերազես այսօր 10,7 տոկոս ունենաս: Այս մասին, այսօր՝ հոկտեմբերի 22-ին, լրագրողների հետ հանդիպման ժամանակ նշեց ՀՀԿ մամուլի խոսնակ Էդուարդ Շարմազանովը:
«Դուք առաջարկում էիք տնտեսական հեղափոխություն, շռնդալից, թռիչքային զարգացում, բայց բյուջեում 4,9 տոկոս եք դրել: Որեւէ տնտեսագետի հարցրեք՝ 4,9 տոկոսով թռիչքային զարգացում, տնտեսական հեղափոխություն հնարավո՞ր է: 350 հազար դոլար կարողանում է իր ինքնաթիռի համար օգտագործել, 2 մլն-ով իր առանձնատունը վերանորոգի, բայց տատիկ-պապիկների նիսյաները փակելու, աշխատատեղեր ստեղծել չի կարողանո՞ւմ: Պարոն փաշինյանը պետական բյուջեն խառնել է իր անձնական բյուջեի հետ եւ իր նախարարների աշխատավարձն է ավելացնում»,-ընդգծեց Շարմազանովը՝ հավելելով, որ այսօրվա իշխանությունը ֆեյք իշխանություն է:
ՀՀԿ խոսնակը նաեւ հայտարարեց, որ այսօրվա վարչապետը գործեր է կարում նրանց վրա, որոնք քիչ թե շատ անկախ են. «Հայաստանում այսօր գրեթե միակ անկախ եւ Սահմանադրության տառին եւ ոգուն համապատասխան գործառույթներ իրականացնում է միայն ՍԴ-ն: Եթե Հրայր Թովմասյանը եւ ՍԴ դատավորները Քոչարյանի գործով կամ մի շարք այլ գործերով մի քիչ այլ կարծիք ունենային, կտեսնեիք, թե այդ 88 հոգի քայլողները ոնց են ծափահարում: Երկրի նախագահից մինչեւ ամենավերջին պաշտոնյան մենք ենք ընտրել, այդ ոնց եղավ, որ սրանք լեգիտիմ են, իսկ ՍԴ նախագահն ու դատավորները, որոնք Փաշինյանի հրամանները չեն կատարում, լեգիտիմ չեն: Ակնհայտ է, որ այստեղ իրավական տրամաբանության մասին խոսելը ծիծաղելի է»: