ՀՀԿ մամուլի խոսնակ Էդուարդ Շարմազանովը հասկանալի է համարում, թե ինչու ՀՀԿ-ն, որը 2017-ի ընտրություններին ստացել էր 770 հազար ձայն, մեկ տարի հետո ստացավ 13 անգամ քիչ ձայն:
Հարցին, թե ինչպես ստացվեց, որ 1 տարում ՀՀԿ-ի ձայներն այդպես կտրում նվազեցին, ինչու այդպես եղավ, Շարմազանովն ասաց, որ նույն հաջողությամբ, 2017-ի ընտրություններում Նիկոլ Փաշինյանի գլխավորած «Ելք» դաշինքը 13 անգամ պակաս ձայն էր ստացել, քան 2018-ի ընտրություններին:
«2017-ի ԱԺ ընտրությունները Փաշինյանը եւ իր «Ելք» խմբակցությունը չեն բողոքարկել: Նա ընդունել է, որ ՀՀԿ-ն այդքան ձայն է հավաքել:
Դա նույն բանն է, որ բոլշեւիկյան Հայաստանում ՀՅԴ-ն 60 հազար ձայն ստանար: Նման էյֆորիկ տրամադրությունների, նման ատելության եւ քաղաքական տեռորի պայմաններում ես գտնում եմ, որ ՀՀԿ-ն շատ լավ ցուցանիշ է ապահովել»,-ասաց Շարմազանովը:
Նա հայտարարեց, որ ՀՀԿ-ան այսօր գրեթե միակ այլընտրանքն է որպես կուսակցությունն է այսօրվա վարչակարգին. «Այսօր ԱԺ-ն ընդդիմադիր խմբակցություններ չունի: Ինձ համար ընդդիմադիրը նրանք են, որոնք չեն ընդունում եւ չեն ողջունել հեղափոխությունը: Այսօր ԱԺ-ում երկու կուսակցություններն էլ թուղթ ու գրիչով եղել են Նիկոլ Փաշինյանի կառավարության անդամներ:
Մենք այսօր արտախորհրդարանական ամենակազմակերպված եւ ամենաշատ ձայն ստացած ընդդիմությունն ենք: Մենք 4-րդ ամենաշատ ձայն ստացած ուժն ենք 11 ուժերի մեջ, որոնք մասնակցել են ընտրություններին: Այն ընտրությունների, որոնք տեղի են ունեցել տեռորի, ատելության պայմաններում»,-ընդգծեց նա: