Facebook ընկերությունը նախաձեռնել է իրեն պատկանող Instagram սոցցանցի օգտատերերի անձնական տվյալների արտահոսքի հետաքննությունը։ Այս մասին ՏԱՍՍ-ին հայտնել են Facebook-ի մամուլի ծառայությունում։
Ավելի վաղ ԶԼՄ-ները հայտնել էին, որ Instagram-ից մեծ արտահոսք է գրանցվել, խարդախները վաճառքի էին հանել 20 մլն հաշվի տվյալներ։
«Մենք հետաքննություն ենք սկսել՝ կապված անցյալ շաբաթվա տվյալների այդ բազայի հետ։ Այս փուլում, կարծում ենք, որ անձնական տվյալներին հասանելիություն չի եղել։ Սքրափինգի (տվյալների հավաքագրում) ձեւը, որն օգտագործվել է, այլեւս հնարավոր չէ այն փոփոխություններից հետո, որոնք մենք կատարել ենք նախկինում այս տարի»,- հայտնել է Facebook-ի ներկայացուցիչ Ստեֆանի Օտվեյը։
Նրա խոսքերով, ընկերությունը մարդկանց տվյալների անվտանգության համար կշարունակի ծառայության տվյալների հավաքագրման հայտնաբերման եւ դադարեցման աշխատանքը։
«Իզվեստիա» պարբերականը հոկտեմբերի 21-ին հայտնել էր, որ տվյալների արտահոսքի մեղքը հնդկական մարքեթինգային ընկերությանն է, որը բաց է թողել իր սերվերներին հասանելիությունը։ Տվյալների բազայի մեծ մասը այնպիսի հաշիվներ, լայքեր եւ մեկնաբանություններ էին, որոնք բոլորին էին հասանելի, սակայն 20 000 տվյալներ պարունակել են հաշիվների տերերի լրիվ անուն-ազգանունները, նրանց էլեկտրոնային եւ փոստային հասցեները, ինչպես նաեւ բջջային հեռախոսների համարները։