Ընտանի կատուները արթնացրել են իրենց տերերին՝ ջենովացի զույգին, դրանով իսկ փրկել ընտանիքը սողանքից, որը քանդել էր տունը, տեղեկացնում է ՌԻԱ «Նովոստի»-ն՝ հղում կատարելով Il Secolo XIX-ին։
«Կինս անկողնուց վեր կացավ, որովհետեւ մեր կատուները՝ Սիմբան եւ Մովսեսը, աղմկում էին ու արթնացնում մեզ։ Երբ նա մոտեցավ նայելու, թե ինչ է կատարվում, նկատեց, որ նրանք խաղում են ծեփի կտորի հետ։ Այն հենց նոր պոկվել էր առաստաղից։ Հենց նրանց շնորհիվ մենք փրկվեցինք»,- ասել է Կլաուդիո Պյանա անունով տղամարդը։
Նրա տունը Կամպո Լիգուրայում վնասվել էր երկուշաբթի գիշեր Իտալիայի հյուսիս-արեւմուտքում վատ եղանակի պատճառով։ Հորդ անձրեւները տարածաշրջանում հանգեցրել էին ոչ միայն ընդարձակ տարածքների հեղեղումների, այլեւ ցեխաջրերի հոսքի, հողաշերտի փլուզումների ավտոճանապարհներին, գետերը դուրս էին եկել ափերից։ Տարհանվել է ավելի քան հարյուր բնակիչ, երկու մարդ զոհվել է։
Պյանայի խոսքով՝ նա եւ իր կինը որոշել են տնից հեռանալ եւ ճանապարհին տեսել, թե ինչպես է պատերին ճաք առաջանում։ Նույն գիշեր սողանքը հեղեղել է տան հիմքը։ Զույգը վազքով հասել է մեքենային, բայց հայտնվել ցեխաջրերի գերության մեջ։ Մի քանի րոպե հետո նրանց փրկել են հրշեջները։
«Զանգահարեց եղբայրս եւ ասաց. «Կլաուդիո, տունդ քանդվել է»։ Հիմա մենք պետք է գնանք Ջենովա։ Մենք ոչինչ չունենք։ Հրշեջներն ասացին, որ մենք երբեք չենք կարողանա վերադառնալ, դա շատ վտանգավոր է»,- ասել է Պյանան։
Տեսանյութում, որը հրապարակվել է պարբերականի կայքում, ցույց են տրված կիսով չափ փլված տունը եւ փլատակները։
«Համենայն դեպս, Սիմբան եւ Մովսեսը ողջ են մնացել»,- ասել է իտալացին։ Պատահարից հետո նրա ընտանիքին ապաստանել է բարեկամը։
