Փարիզի հյուսիսում հարձակում է կատարվել Սամուել-Մուրատյան հայկական վարժարանի դեմ։ Այս մասին Ֆրանսիայում Հայաստանի դեսպան Հասմիկ Տոլմաջյանը գրել է իր Թվիթերում։
Դեսպանը դատապարտել է վանդալիզմի ակտը։
«Մենք լրջորեն անհանգստացած ենք կրկնվող վանդալիզմից Սեւրի Սամուել-Մուրատյան հայկական վարժարանի դեմ։ Այդ գործողությունները չպետք է անպատիժ մնան»,- գրել է նա։
Նշենք, որ առաջին հարձակումը վարժարանի վրա տեղի էր ունեցել 2019-ի հունվարին։
Հիշեցնենք, որ հոկտեմբերի 20-ին Ֆրանսիայում Հայաստանի դեսպանությունը տեղեկացրել էր այդ երկրում հրատարակվող ֆրանսալեզու Nouvelles d'Arménie (Հայաստանի նորություններ) ամսագրի գրասենյակի վրա հարձակման մասին։
«Հայաստանի դեսպանությունը Ֆրանսիայում վճռականորեն դատապարտում է հարձակումը Nouvelles d'Arménie ամսագրի գրասենյակի վրա։ Դա լուրջ ոտնձգություն է խոսքի ազատության եւ հանրապետական արժեքների հանդեպ»,- ասվում է հայտարարությունում, որը տեղադրվել է դեսպան Հասմիկ Տոլմաջյանի Թվիթերի միկրոբլոգում։
Պարբերականի տվյալներով՝ հարձակումը կատարվել է կիրակի գիշեր։ Նշվում է, որ կոտրվել է խմբագրության դուռը, գողացել են տեսախցիկն ու երեք համակարգիչ, որտեղ պահվում էին գաղտնի տեղեկություններ։
