Պատգամավոր Արման Բաբաջանյանի եւ Նաիրի Հունանյանի հանդիպումը կարեւոր էր այն իմաստով, որ խորհրդարանի վրա հարձակումից 20 տարի անց նա վաղաժամկետ ազատման դիմում ներկայացնելու հնարավորություն ունի: Այս մասին հոկտեմբերի 25-ին ԱԺ-ում ճեպազրույցի ժամանակ հայտարարեց «Իմ քայլի» պագամավոր Անդրանիկ Քոչարյանը:

Ընդ որում, նա նշեց, որ պետությունն իրավական գործիքներ ունի օրինական հիմքով ցանկությունն իրականացնելու համար: Քոչարյանը նաեւ նշեց, որ կա կարծիք, համաձայն որի՝ հանրությունը դեռ պատրաստ չէ Նաիրի Հունանյանին տեսնել ազատության մեջ, հավելելով, որ ինքը եւս պատրաստ չէ: «Ամեն դեպքում այնքան ժամանակ, քանի դեռ նա հրաժարվում է համագործակցել քննության հետ: Այդ պատճառով գործը կասեցվել է: Այդպիսով, ահաբեկչության կազմակերպիչների մասով գործը փակվել է»,- ասաց պագամավորը:   

Հիշեցնենք, որ Նաիրի Հունանյանը դատապարտվել է 1999 թվականի հոկտեմբերի 27-ի ահաբեկչության գործով։ Այդ օրը նա իր հանցակիցների հետ զավթել է Հայաստանի խորհրդարանը։ Հարձակման հետեւանքով սպանվել են նախագահ Կարեն Դեմիրճյանը, վարչապետ Վազգեն Սարգսյանը եւ վեց պատգամավոր, եւս 30 հոգի ծանրության տարբեր աստիճանի վիրավորումներ է ստացել։ Ահաբեկչության պատվիրատուներն այդպես էլ չեն բացահայտվել։