Իններորդ օրն է՝ Լիբանանում շարունակվում են բողոքի ցույցերը, որոնք կարող են երկիրը կաթվածահարել, չնայած ընդդիմության ներկայացուցիչների հետ հանդիպելու նախագահի առաջարկին, փոխանցում է AFP-ն:
Բողոքի ցույցերն ընթանում են բոլոր քաղաքներում եւ գյուղերում, ինչը հանգեցրել է բանկերի եւ դպրոցների փակվելուն: Ցուցարարները պահանջում են երկրի ներկայիս ղեկավարության հրաժարականը:
Լիբանանի ազգային դրոշները թափահարելով՝ ցուցարարները պահանջում են Լիբանանի բոլոր քաղաքական առաջնորդների հրաժարականը:
Վարչապետ Սաադ Հարիրին, փորձելով ցուցարարներին հանդարտեցնել, առաջ է մղել տնտեսական բարեփոխումների փաթեթը, իսկ երկրի նախագահ Միշել Աունը հինգշաբթի առաջարկել է հանդիպել ցուցարարների ներկայացուցիչների հետ՝ նրանց պահանջները քննարկելու համար: Բայց ցուցարարների համար այս միջոցառումները բավարար չեն: Նրանք պահանջում են, որ կառավարությունը հրաժարական ներկայացնի՝ նոր ընտրությունների համար հող նախապատրաստելու համար:
Ուրբաթ առավոտյան ցուցարարները կրկին փակել են Բեյրութի հիմնական ավտոմայրուղիները, այդ թվում՝ օդանավակայան տանող ճանապարհը եւ երկրորդ քաղաք Տրիպոլիի եւ երկրի հյուսիսային հատվածի ուղղությամբ ձգվող առափնյա ճանապարհը: Բեյրութից հյուսիս ավտոճանապարհի վրա ցուցարարները ուղեմասում վրաններ են դրել:
