ԱՊՀ-ի պաշտպանության նախարարները չորեքշաբթի Բաքվում կքննարկեն Սիրիայում մարտական գործողությունների ընթացքում անօդաչուների զանգվածային հարձակումներին հակահարված տալու փորձը, հաղորդում է ՌԻԱ Նովոստին՝ հղում անելով ԱՊՀ գործադիր կոմիտեին:
Հոկտեմբերի 30-ին Բաքվում կայանալիք ԱՊՀ պաշտպանության նախարարների խորհրդի նիստին, ինչպես ակնկալվում է, կմասնակցի ԱՊՀ գործադիր կոմիտեի նախագահ Սերգեյ Լեբեդեւը:
«Խորհրդի անդամները կքննարկեն մինչեւ 2025 թվականը ԱՊՀ պետությունների ռազմական համագործակցության ծրագրերն ու ճառագայթային, քիմիական եւ կենսաբանական իրավիճակի գնահատման ու վերահսկողության միասնական համակարգի զարգացման հիմնական ուղղությունները: Ծրագրվում է քննարկում Սիրիայի Արաբական Հանրապետությունում անօդաչուների հարձակումներին հակահարված տալու փորձի ու Լաոսի Ազգային ժողովրդավարական Հանրապետությունում մարդասիրական ականազերծման խնդիրների իրականացման շուրջ»,- ասվում է հաղորդագրության մեջ:
Նիստին կամփոփվեն Բանակային միջազգային խաղեր-2019-ի արդյունքները, կքննարկվեն ԱՊՀ երկրների զինված ուժերի համար սպայական կադրերի պատրաստման հարցերը, «Ստարտ գիտության մեջ» գիտական նորարարական գաղափարների միջազգային փառատոնի անցկացումն ու Հաղթանակի 75-ամյակի տոնակատարություններին նախապատրաստումը:
«Բացի այդ, ծրագրվում է ուրվագծել 2020-ին ԱՊՀ մասնակից պետությունների հակաօդային պաշտպանական միասնական համակարգերի համատեղ միջոցառումները, քննարկել ԱՊՀ մասնակից պետությունների բազային կազմակերպության գործունեությունը (ՌԴ ՊՆ ռազմական համալսարան): Կամփոփվեն նաեւ 2019-ին ռազմական համագործակցության զարգացման արդյունքներն ու կուրվագծվի 2020-ին ԱՊՀ մասնակից պետությունների պաշտպանության նախարարների խորհրդի աշխատանքը»,- ասվում է հաղորդագրության մեջ:
Պաշտպանության նախարարները կքննարկեն նաեւ ռազմական համագործակցության միջազգային-իրավական բազայի գույքագրության եւ ԱՊՀ պետությունների զինված ուժերի մետրոլոգիական ապահովման ոլորտում նորմատիվ-իրավական կարգավորման կատարելագործման հարցերը: Նիստին կքննարկվեն նաեւ ֆինանսական, կադրային եւ կազմակերպչական հարցեր: