ԱՄՆ-ը հաստատել է, որ եվրոպական եւ հյուսիսատլանտյան ինտեգրման ճանապարհին աջակցում է Հյուսիսային Մակեդոնիային։ Եվրոպայի եւ Եվրասիայի հարցերով ԱՄՆ պետքարտուղարի օգնականի տեղակալ Մեթյու Փալմերի հետ հանդիպմանն այսպիսի հայտարարությամբ է հանդես եկել Հյուսիսային Մակեդոնիայի պաշտպանության նախարար Ռադմիլա Շեկերինսկայան, հայտնում է ՏԱՍՍ-ը։

«ԱՄՆ Կոնգրեսի սենատում արձանագրության վավերացումը եւ պետքարտուղար Պոմպեոյի այցը ԱՄՆ-ի կողմից Հյուսիսային Մակեդոնիայի ռազմավարական գործընկերության եւ աջակցության վառ վկայությունն են։ ԵՄ-ին անդամագրվելու բանակցությունների մեկնարկի մասին Եվրոպական միության չկայացած որոշումը չի փոխում մեր դիրքորոշումը՝ մենք կշարունակենք աշխատել Եվրոպական միությանը եւ NATO-ին անդամակցության մեր ռազմավարական նպատակներին հասնելու համար»,- նշել է Շեկերինսկայան։

Հոկտեմբերի 22-ին Սենատը NATO-ին Հյուսիսային Մակեդոնիայի միացման մասին արձանագրություն էր ընդունել։ Սենատորներից 91-ը կողմ էր քվեարկել, 2-ը՝ դեմ։