BMW M մարդատար ավտոմեքենաները դեռեւս կպահպանեն իրենց ավանդական ուժային սարքերը, սակայն քրոսովերների անցումը հիբրիդային քարշուժի անխուսափելի կլինի, գրում է Motor-ը:
BMW M-ի ղեկավար Մարկուս Ֆլաշը CarAdvice պարբերականին հայտնել է, որ BMW մարդատար մոդելներին՝ М2-ից մինչեւ М8, հիբրիդացում դեռեւս չի սպառնում, քանի որ բենզինային շարժիչները լավ են լուծում առաջադրված խնդիրները: Իսկ ավելի խոշոր եւ ծանր բավարական Х5 М եւ Х6 М քրոսովերների դեպքում, որոնց զանգվածը հասնում է գրեթե 2,5 տոննայի, իրավիճակն այլ է. ավանդական ուժային սարքերն իմաստ ունի համալրել էլեկտրաշարժիչներով՝ լավագույն դինամիկայի համար:
BMW M-ի ղեկավարը նշել է, որ «թեժ» քրոսովերների հիբրիդացումը ծրագրվում է ոչ թե ժամանակակից միտումներին համապատասխանելու նպատակով, այլ այն պատճառով, որ դա BMW M-ին թույլ կտա էլ ավելի տպավորիչ դինամիկ բնութագրերի հասնել վառելիքի ծախսի միաժամանակյա նվազեցմամբ: Ընդ որում, նա չի հերքել հավանականությունը, որ ավելի պահպանողական երկրպագուներ կարող են բացասաբար վերաբերվել փոփոխություններին՝ համարելով, որ հիբրիդները չեն համապատասխանում բավարական M-երի իմիջին: Բարեբախտաբար, Ֆլաշի խոսքով, այդպես են կարծում ոչ բոլոր հաճախորդները: