Նոյեմբերի 6-ին կմեկնեմ Մոսկվա, որտեղ կհանդիպեմ «Ռուսական երկաթուղիների» գլխավոր տնօրենի հետ, կքննարկենք «Հարավկովկասյան երկաթուղիներում» նոր ներդրումների հարցը: Այս մասին նոյեմբերի 4-ին ԱԺ մշտական հանձնաժողովների համատեղ նիստին 2020-ի պետբյուջեի նախնական քննարկման ժամանակ հայտարարեց ՀՀ տարածքային կառավարման եւ ենթակառուցվածքների նախարար Սուրեն Պապիկյանը՝ պատասխանելով «Լուսավոր Հայաստան» խմբակցության պատգամավոր, ԱԺ ֆինանսավարկային եւ բյուջետային հարցերի հանձնաժողովի նախագահ Մանե Թանդիլյանի հարցին, որը հետաքրքրվեց Հայաստանում, մասնավորապես Ալավերդիում երկաթգծի իրավիճակի մասին:
Նրա խոսքով՝ այս պահին կոնցեսիոն համաձայնագիր է ստորագրվել, որը նախատեսում է մինչեւ 2038 թվականը 57 մլրդ-ի չափով ներդրումներ:
Սակայն նախարարը նշեց, որ իրենք ցանկանում են արագացնել մեծացնել ներդրումները, քանի որ չեն կարող երկար սպասել:
«Մի բան է 57 մլրդն օգտագործել 2038 թվականին, մի բան է՝ առաջիկա տարիներին: Նախատեսում ենք 35-37 մլրդ ծախսել մինչ 2038-ը»,- պարզաբանեց Պապիկյանը:
Ինչ վերաբերում է Ալավերդիում երկաթգծի խնդրին, նախարարը հայտնեց, որ իր տեղակալը այցելել է նշված տարածք, ուսումնասիրել խնդիրը, եւ շուտով գրավոր պատասխան կտվրի Թանդիլյանին հուզող խնդրին:
