Իրանն առաջին անգամ ակնհայտորեն հայտարարեց միջուկային գործարքը դադարեցնելու իր մտադրության մասին, ասել է Ֆրանսիայի նախագահ Էմանուել Մակրոնը, տեղեկացնում է Reuters-ը։
Ելույթ ունենալով Չինաստան կատարած այցն ամփոփող մամուլի ասուլիսում՝ Մակրոնը Իրանի վերջին որոշումն անվանել է «գերեզման» միջուկային համաձայնագրի համար։
«Ես կարծում եմ, որ Իրանն առաջին անգամ ուղղակի եւ աներկբա հասկանալ տվեց, որ պատրաստվում է դուրս գալ միջուկային համաձայնագրից, ինչը խոր տեղաշարժ է նշանակում»,- ասել է Մակրոնը, որը գործարքը փրկելու եվրոպական ջանքերի առաջնագծում էր այն բանից հետո, երբ Միացյալ Նահանգները դուրս եկավ համաձայնագրից։
Ավելի վաղ Իրանի նախագահը հայտարարել էր, որ Թեհրանը նոյեմբերի 6-ից չորրորդ անգամ կհրաժարվի միջուկային գործարքի պարտավորությունների կատարումից եւ կսկսի ուրանի հարստացման ցենտրիֆուգներն օգտագործել Ֆորդոյի օբյեկտում՝ դրանց գազ մատակարարելու միջոցով։
