Համացանցի ազատության մասին իր ամենամյա զեկույցում Freedom House իրավապաշտպան կազմակերպությունն ուսումնասիրել է համացանցի ազատությունը 6 տարածաշրջանների 65 երկրներում։ Հայաստանն, ըստ զեկույցի, ստացել է 76 միավոր և մշտադիտարկված երկրների ցանկում հայտնվել 8-րդ հորիզոնականում։ Արդեն երկրորդ անգամն է, ինչ Հայաստանը դասվում է ազատ երկրների շարքը։ Անցած տարվա զեկույցում ևս Հայաստանը ազատ երկրների շարքում էր։
Սակայն, «Մեդիա Պաշտպան» նախաձեռնության ուսումնասիրությունները չեն համընկնում Freedom House-ի դիտարկումների հետ։ «Համացանցային մամուլը 2018-2019-ին աննախադեպ թվով՝ 91 հատ դատական հայց է ստացել, քրեական գործեր են հարուցվել համացանցում գործող էջերի նկատմամբ, որոնք դասակարգվել են որպես «Ֆեյք», անգամ տեղի է ունեցել ձերբակալություն», նշում է «Մեդիա Պաշտպանը», հիշեցնելով, որ այս ժամանակահատվածում ուժայինները մուտք են գործել բացառապես համացանցում գործող Yerevan.today և Aysor.am լրատվականների խմբագրություններ։
«Վերջին շրջանում ակտիվացել են լրագրողների նկատմամբ ճնշումները և որոշ հրապարակումների համար անգամ լրագրողները կանչվել են ՀՔԾ, որպեսզի բացահայտեն հոդվածի իրենց աղբյուրները։ Խոսքը, մասնավորապես, Hayeli.am և Armlur.am կայքերի գլխավոր խմբագիրներին է վերաբերվում։ ankakh.com կայքի գլխավոր խմբագիր Վարդուհի Իշխանյանն իր ֆեյսբուքյան գրառման համար հրավիրվել է ոստիկանության 6-րդ վարչություն։ Առցանց մամուլում գործող լրատվականները պարբերաբար բաժանվում են յուրայինների և ոչ յուրայինների։ Հարձակում է տեղի ունեցել Hayeli.am-ի վրա», գրել է «Մեդիա Պաշտպանը», նաեւ ընդգծել, որ այս տվյալները հաշվի առնելով՝ եզրակացրել է, որ Freedom House միջազգային իրավապաշտպան կազմակերպությունը հայաստանյան գործող և հայաստանյան ցանցը մշտադիտարկող կազմակերպություններից ոչ օբյեկտիվ տվյալներ է ստացել, որոնք էլ ազատ համացանց ունենալու մասին զեկույցի հիմք են հանդիսացել։